ప్రస్తుతం ఇండియన్ సినిమా ప్రేక్షకులు ఎంతో ఆసక్తిగా ఎదురుచూస్తున్న పాన్ వరల్డ్ ప్రాజెక్టుల్లో ‘వారణాసి’ (Varanasi) ఒకటి. సూపర్ స్టార్ మహేష్ బాబు, గ్లోబల్ స్టార్ డైరెక్టర్ ఎస్.ఎస్. రాజమౌళి కలయికలో తెరకెక్కుతున్న ఈ చిత్రం అనౌన్స్మెంట్ నుంచే భారీ అంచనాలను సొంతం చేసుకుంది. వీరిద్దరి తొలి కాంబినేషన్ కావడంతో సినిమాపై దేశవ్యాప్తంగా మాత్రమే కాకుండా ప్రపంచవ్యాప్తంగా ఆసక్తి నెలకొంది.
ఈ ప్రతిష్టాత్మక చిత్రానికి లెజెండరీ సంగీత దర్శకుడు ఎం.ఎం. కీరవాణి సంగీతం అందిస్తున్నారు. ఇప్పటికే విడుదలైన కాన్సెప్ట్ గ్లింప్స్లోని బ్యాక్గ్రౌండ్ స్కోర్ ప్రేక్షకులను ఆకట్టుకుంది. దీంతో పూర్తి ఆల్బమ్ ఎలా ఉండబోతుందనే ఆసక్తి మరింత పెరిగింది. ఈ నేపథ్యంలో కీరవాణి ‘వారణాసి’ ఆల్బమ్కు సంబంధించి కీలక విషయాన్ని వెల్లడించారు.
మొత్తం 6 పాటలతో ‘వారణాసి’ ఆల్బమ్
ఇటీవల జరిగిన ఓ ఇంటరాక్షన్లో కీరవాణి మాట్లాడుతూ ‘వారణాసి’ ఆల్బమ్ చాలా గ్రాండ్గా ఉండబోతుందని తెలిపారు. అంతేకాకుండా ఈ సినిమాలో మొత్తం ఆరు పాటలు ఉంటాయని స్పష్టం చేశారు. దీంతో ఆల్బమ్పై నెలకొన్న ఆసక్తికి ఇప్పుడు మరింత క్లారిటీ వచ్చింది.
ఇప్పటికే రెండు పాటలు విడుదల
ఇప్పటికే ‘వారణాసి’ నుంచి ‘రణ కుంభ’, ‘సంచారి’ పాటలు విడుదలై మంచి స్పందనను అందుకున్నాయి. ఈ రెండు పాటలు ప్రేక్షకులను ఆకట్టుకోవడంతో మిగిలిన నాలుగు పాటలపై కూడా భారీ అంచనాలు నెలకొన్నాయి.
మొత్తంగా ఆరు పాటల్లో రెండు ఇప్పటికే ప్రేక్షకుల ముందుకు రాగా, మరో నాలుగు పాటలు విడుదల కావాల్సి ఉంది. ఈ మిగిలిన పాటలను మేకర్స్ ఎప్పుడు విడుదల చేస్తారనేది ఇప్పుడు ఆసక్తికరంగా మారింది.
