Balayya – Gopichand: సినిమా మేకింగ్లో సాధారణంగా షూటింగ్ ప్లాన్ ఒకలా ఉంటుంది. సీన్ ఇటు, సీన్ అటు చిత్రీకరించి చివర్లో అన్నింటినీ కుదుర్చుకుంటారు. కానీ ఐటెమ్ సాంగ్ విషయంలో మాత్రం చాలా సినిమాలు చివరి దశ వరకూ ఆగుతుంటాయి. షూటింగ్ దాదాపు పూర్తయ్యే సమయానికి గానీ పాట ప్లానింగ్ మొదలుపెట్టరు. అప్పుడే ‘ఎవరా ఐటెమ్ భామ?’ అనే చర్చ తెరపైకి వస్తుంది. హీరోయిన్లు, మాజీ హీరోయిన్లు, గ్లామర్ డాల్స్ పేర్లు తిరుగుతూ చివరకు ఒకరు ఫైనల్ అవుతారు.
ఈ ప్రక్రియలో కొన్నిసార్లు హీరోయిన్ కుదరక షూటింగ్లు ఆలస్యం కావడం, రిలీజ్ డేట్ మారిపోవడం లాంటి సమస్యలు కూడా ఎదురవుతుంటాయి. అలాంటి ఇబ్బందులు వద్దు అనుకున్నారో ఏమో… NBK 111 సినిమా టీమ్ మాత్రం ముందే అప్రమత్తమైంది. ఇప్పటికే ఐటెమ్ సాంగ్ కోసం లిరిక్స్, ట్యూన్ రెడీ చేయించడమే కాదు, వీలైనంత త్వరగా పాటను షూట్ చేయాలనే ఆలోచనలో కూడా ఉన్నట్టు సమాచారం. అందుకే ఇప్పుడే ఐటెమ్ భామను ఫైనల్ చేసే పనిలో పడ్డారట.
బాలకృష్ణ సినిమాల్లో ఐటెమ్ సాంగ్స్కి ప్రత్యేకమైన క్రేజ్ ఉంటుంది. మాస్ బీట్, బాలయ్య మాస్ స్టెప్పులు కలిస్తే సినిమా ఫలితంతో సంబంధం లేకుండా పాట హిట్ అవుతుందన్న నమ్మకం అభిమానుల్లో ఉంది. ఇప్పుడు గోపీచంద్ మలినేని దర్శకత్వంలో తెరకెక్కుతున్న ఈ కొత్త సినిమాలో కూడా అలాంటి పాట ఉండబోతుందట.
ఈ పాట కోసం బాలీవుడ్ నుంచి టాలీవుడ్ వరకూ పలువురు కథానాయికల పేర్లను పరిశీలిస్తున్నారని టాక్. ఈ క్రమంలో బాలీవుడ్ భామ నర్గీస్ ఫక్రీ పేరు ముందుకు వచ్చింది. ఆమె టీమ్తో ఇప్పటికే దర్శకుడు గోపీచంద్ మలినేని టీమ్ చర్చలు జరిపినట్టు సమాచారం. ఒకసారి ఓకే అయితే వెంటనే పాట షూటింగ్ మొదలుపెట్టాలని ప్లాన్ చేస్తున్నారట.
‘వీర సింహారెడ్డి’ తర్వాత బాలయ్య – గోపీచంద్ మలినేని కాంబోలో వస్తున్న ఈ సినిమాను నిర్మాత వెంకట సతీశ్ కిలారు నిర్మిస్తున్నారు. ఈసారి ఐటెమ్ సాంగ్ కూడా ముందే పూర్తయ్యి, లాస్ట్ మినిట్ కష్టాలు లేకుండా సినిమా రిలీజ్కి వెళ్లాలని మేకర్స్ భావిస్తున్నట్టు తెలుస్తోంది.