మాస్ మహారాజా రవితేజ ప్రధాన పాత్రలో దర్శకుడు శివ నిర్వాణ తెరకెక్కించిన తాజా చిత్రం ‘ఇరుముడి’ (Irumudi). ఎన్నో అంచనాల మధ్య ఈ సినిమా ఆగస్టు 21న గ్రాండ్గా ప్రేక్షకుల ముందుకు వచ్చింది. ఇప్పటికే పాటలు, టీజర్, ట్రైలర్తో మంచి హైప్ క్రియేట్ చేసిన ఈ మూవీకి విడుదలైన వెంటనే పాజిటివ్ టాక్ వస్తోంది.
ఈ సినిమాలో రవితేజకు జోడీగా ప్రియా భవానీ శంకర్ కథానాయికగా నటించింది. అయితే వీరిద్దరితో పాటు మరో చిన్నారి తన నటనతో ప్రేక్షకుల దృష్టిని ఆకర్షించింది. సినిమాలో రవితేజ కూతురిగా కనిపించిన ఆ అమ్మాయి ఎవరు? ఆమెకు ఈ సినిమాలో అవకాశం ఎలా వచ్చింది? అనే ఆసక్తి ఇప్పుడు నెటిజన్లలో మొదలైంది.
‘ఇరుముడి’ సినిమాలో మణికంఠ అనే పాత్రలో కనిపించిన ఆ చిన్నారి పేరు బేబీ నక్షత్ర. ప్రస్తుతం ఏడో తరగతి చదువుతున్న నక్షత్ర ఇప్పటికే పలు భాషల్లో సినిమాలు చేసినట్లు తెలిపింది. తాజాగా హైదరాబాద్లో మీడియాతో మాట్లాడిన ఆమె తన సినీ ప్రయాణం గురించి ఆసక్తికర విషయాలను వెల్లడించింది.
ఇన్స్టాగ్రామ్ రీల్స్ చూసి ఛాన్స్
ఇప్పటివరకు తాను ఆరు సినిమాల్లో నటించినట్లు నక్షత్ర తెలిపింది. తెలుగు, తమిళం, కన్నడ, మలయాళం భాషల్లో సినిమాలు చేయడం ద్వారా ఆయా భాషలు, సంస్కృతుల గురించి తెలుసుకునే అవకాశం లభించిందని చెప్పింది.
‘ఇరుముడి’లో అవకాశం ఎలా వచ్చిందనే విషయాన్ని కూడా ఆమె వెల్లడించింది. తాను ఇన్స్టాగ్రామ్లో చేసిన రీల్స్ను చూసిన దర్శకుడు శివ నిర్వాణ తనను సినిమాలో నటించేందుకు ఎంపిక చేసినట్లు తెలిపింది. ఈ సినిమాలో మణికంఠ అనే అమ్మాయి పాత్రలో, రవితేజ కూతురిగా కనిపిస్తానని చెప్పింది.
రవితేజ, ప్రియా భవానీ శంకర్తో మంచి అనుబంధం
షూటింగ్ సమయంలో రవితేజ, ప్రియా భవానీ శంకర్ తనతో ఎంతో స్నేహంగా ఉండేవారని నక్షత్ర తెలిపింది. దర్శకుడు శివ నిర్వాణ కూడా ఎంతో సహకరించడంతో షూటింగ్ను సరదాగా, సంతోషంగా పూర్తి చేసినట్లు చెప్పుకొచ్చింది.
తెలుగు భాష తనకు అర్థమవుతుందని, అందుకే సినిమాలో తన పాత్రకు తానే డబ్బింగ్ చెప్పుకున్నానని తెలిపింది. సీలేరు ప్రాంతంలో జరిగిన షూటింగ్ కూడా తనకు ఎంతో నచ్చిందని, అక్కడి వాతావరణం కేరళను గుర్తు చేసిందని చెప్పింది.
స్టార్ హీరోలతో నటించే అవకాశం
తన తల్లిదండ్రులు, ఉపాధ్యాయుల సహకారం వల్లే సినిమాల్లో నటించగలుగుతున్నానని నక్షత్ర పేర్కొంది. ఇప్పటివరకు పృథ్వీరాజ్ సుకుమారన్, శివరాజ్కుమార్, రవితేజ వంటి ప్రముఖ హీరోలతో కలిసి నటించే అవకాశం రావడం ఎంతో ఆనందంగా ఉందని తెలిపింది.
ప్రస్తుతం బేబీ నక్షత్ర చేసిన ఈ వ్యాఖ్యలు సోషల్ మీడియాలో వైరల్ అవుతున్నాయి. ‘ఇరుముడి’లో రవితేజ కూతురిగా ఆమె చేసిన నటనకు ప్రేక్షకుల నుంచి ఎలాంటి స్పందన వస్తుందో చూడాలి.
