తెలుగు చిత్ర పరిశ్రమలో విభిన్నమైన కథలను ప్రోత్సహిస్తూ తనకంటూ ప్రత్యేక గుర్తింపు తెచ్చుకుంటున్న హీరో కిరణ్ అబ్బవరం Kiran Abbavaram మరో కొత్త ప్రాజెక్ట్ను ప్రకటించారు. తన సొంత బ్యానర్ ‘KA ప్రొడక్షన్స్’పై ‘పౌర్ణమి ఎంటర్టైన్మెంట్స్’తో కలిసి ఈ సరికొత్త చిత్రాన్ని నిర్మిస్తున్నారు.
వై. శివశంకర్ నాయుడుతో కలిసి కిరణ్ అబ్బవరం స్వయంగా ఈ సినిమాను నిర్మిస్తుండగా, అనుష్ గోరక్ దర్శకత్వం వహిస్తున్నారు. కుశులు మద్దాల, రెహమాన్, నమ్రిత ఎం.వి., తనుజా పుట్టుస్వామి ఈ చిత్రంలో ప్రధాన పాత్రల్లో నటిస్తున్నారు.
ఈ మూవీ అనౌన్స్మెంట్ సందర్భంగా విడుదల చేసిన పోస్టర్ ఇప్పుడు ఆసక్తిని రేకెత్తిస్తోంది. సాధారణ పోస్టర్లకు భిన్నంగా, నటీనటుల ముఖాలు చూపించకుండా పక్షుల మాదిరిగా కనిపించే కాళ్లతో ఓ విచిత్రమైన డిజైన్ను మేకర్స్ విడుదల చేశారు. ఈ పోస్టర్ సినిమాపై క్యూరియాసిటీని మరింత పెంచుతోంది.
ఇప్పటివరకు టాలీవుడ్లో పెద్దగా చూడని సరికొత్త జోనర్లో ఈ సినిమా ఉండబోతుందని మేకర్స్ చెబుతున్నారు. పోస్టర్ను చూస్తుంటే కథ, కాన్సెప్ట్ ఎలా ఉండబోతుందనే ఆసక్తి ప్రేక్షకుల్లో మొదలైంది.
ప్రస్తుతం ఈ సినిమాకు సంబంధించిన టైటిల్ను ప్రకటించలేదు. త్వరలోనే టైటిల్తో పాటు ఫస్ట్ లుక్, కథా నేపథ్యం, ఇతర వివరాలను మేకర్స్ వెల్లడించనున్నారు. విభిన్నమైన కథలతో సినిమాలు చేస్తున్న కిరణ్ అబ్బవరం నుంచి వస్తున్న ఈ కొత్త ప్రాజెక్ట్పై ప్రేక్షకుల్లో ఆసక్తి నెలకొంది.
