భాగమతితో గతేడాది విజయాన్ని అందుకున్న అనుష్క ఇప్పుడు ‘సైలెన్స్’ అనే సినిమా ఓకే చేసింది. మాధవన్ ముఖ్య పాత్ర పోషిస్తోన్న ఈ సినిమాను భారీ బడ్జెట్‌తో తెరకెక్కించనున్నారు. ఈ సినిమా కోసం ప్రముఖ నటులు, టెక్నీషియన్లు పనిచేస్తున్నారు. ప్రముఖ సినీ రచయిత కోన వెంకట్ ఈ సినిమాకు కథను అందించడంతో పాటు సహ నిర్మాతగానూ వ్యవహస్తున్నారు. తెలుగు, తమిళంలో ద్విభాషా చిత్రంగా తెరకెక్కుతోన్న ఈ చిత్రాన్ని అత్యధిక శాతం అమెరికాలోనే చిత్రీకరించనున్నారు. కాగా, ఈ సినిమాలో ప్రముఖ అమెరికన్ నటుడు, ‘కిల్ బిల్’ స్టార్ మైఖేల్ మాడ్సెన్‌ను మేకర్స్ సంప్రదించినట్లు అప్పట్లో వార్తలు వచ్చాయి. ఈ 61 ఏళ్ల నటుడికి రూ.3 కోట్ల పారితోషకం ఇచ్చేందుకు కూడా సిద్ధపడ్డారని, కథ విన్న మాడ్సెన్ ఎంతో ఆనందం వ్యక్తం చేశారని కూడా అన్నారు. అయితే ఈ విషయంపై ఇప్పుడు క్లారిటీ వచ్చింది. అనుష్క చిత్రంలో మైఖేల్ మాడ్సెన్ నటిస్తున్నట్లు ఖరారైంది.
ఈ విషయాన్ని సుబ్బరాజు బయటపెట్టారు. ఈ సినిమాకు సంబంధించి వివరాలతో కూడిన పోస్టర్‌ను సుబ్బరాజు తన ట్విట్టర్ ఖాతా ద్వారా ప్రేక్షకులతో పంచుకున్నారు. పోస్టర్‌పై ఉన్న వివరాల ప్రకారం ఈ చిత్రాన్ని కాస్మోస్ ఎంటర్‌టైన్మెంట్స్ సమర్పణలో కిరణ్ స్టూడియోస్, పీపుల్స్ మీడియా ఫ్యాక్టరీ సంయుక్తంగా నిర్మిస్తున్నాయి. కోన వెంకట్, గోపీ మోహన్ కథ, కథనాలు అందిస్తున్నారు. గోపీ సుందర్ సంగీత సమకూరుస్తున్నారు. మాధవన్, అనుష్క, అంజలి, మైఖేల్ మాడ్సన్, సుబ్బరాజు, షాలిని పాండే ప్రధాన పాత్రలు పోషిస్తోన్న ఈ చిత్రానికి వస్తాడు నా రాజు ఫేమ్ హేమంత్ మధుకర్ దర్శకత్వం వహిస్తున్నారు.
