రెండు వారాల కిందట హైదరాబాద్ నగరంలో అర్ధరాత్రి జరిగిన హత్యలు కలకలం రేపాయి. రోడ్ల వెంబడి యాచన చేసుకుంటూ జీవనం సాగిస్తున్న వ్యక్తులు దారుణ హత్యకు గురయ్యారు. ఒకేరోజు హబీబ్ నగర్, నాంపల్లి ఏరియాల్లో జరిగిన ఈ హత్యలు స్థానికంగా అలజడి రేపాయి. బిచ్చగాళ్లను ఎవరు చంపి ఉంటారనే ప్రశ్నలు తలెత్తాయి. కేసు నమోదు చేసి విచారణ చేపట్టిన హబీబ్ నగర్ పోలీసులు ఎట్టకేలకు నిందితుడిని అరెస్టు చేశారు. ఓ సైకో కిల్లర్ ఈ దారుణాలకు పాల్పడినట్లు తేల్చారు. హైదరాబాద్ సీపీ అంజనీకుమార్ వివరాలు వెల్లడించారు.
గత నెల 15 తేదీన హబీబ్ నగర్ పోలీస్ స్టేషన్ పరిధిలో ఓ యాచకుడు దారుణ హత్యకు గురయ్యాడని సీపీ అంజనీకుమార్ తెలిపారు. నాంపల్లిలోనూ మరొకరిని కిరాతకంగా హతమార్చారు. ఈ రెండు ఘటనలు కేవలం నాలుగు గంటల వ్యవధిలోనే జరిగాయని చెప్పారు. కేసు నమోదు చేసి విచారణ చేపట్టి నిందితుడిని అరెస్టు చేశామన్నారు. మద్యం మత్తులో సైకో కిల్లర్ ఈ హత్యలకు పాల్పడినట్లు ఆయన తెలిపారు.
కర్ణాటక రాష్ట్రం బీదర్ ప్రాంతానికి చెందిన సైకో కిల్లర్ ఖదీర్‌ను అరెస్టు చేసినట్లు చెప్పారు. నిందితుడు ఖదీర్ మానసిక స్థితి సరిగ్గా లేదని.. గతంలోనూ పలు కేసులు నమోదై ఉన్నాయన్నారు. గతంలో ఓ మర్డర్ కేసులో జైలు శిక్ష అనుభవించాడని.. బయటికి వచ్చిన తర్వాత హబీబ్ నగర్, నాంపల్లిలో మరో రెండు హత్యలు చేసినట్లు చెప్పారు. మద్యం మత్తులో బిచ్చగాళ్లను చంపేసినట్లు తెలిపారు.