టాలీవుడ్లో భారీ బడ్జెట్, ప్రతిష్టాత్మక చిత్రాలను నిర్మిస్తూ తనకంటూ ప్రత్యేక గుర్తింపు తెచ్చుకున్న నిర్మాణ సంస్థ మైత్రి మూవీ మేకర్స్ Mythri Movie Makers. కథలో విషయం ఉంటే స్టార్ హీరోల సినిమాలకే కాకుండా విభిన్న కంటెంట్ ఉన్న చిత్రాలకు కూడా ఈ సంస్థ ఎప్పుడూ అండగా నిలుస్తూ వస్తోంది. అందుకే మైత్రి బ్యానర్ నుంచి సినిమా వస్తుందంటే అందులో ప్రేక్షకులను ఆకట్టుకునే అంశాలు తప్పకుండా ఉంటాయనే నమ్మకం ఏర్పడింది.
తాజాగా ఈ నిర్మాణ సంస్థ ఖాతాలో చేరిన ఓ అరుదైన రికార్డ్ ఆసక్తిని కలిగిస్తోంది. ఒకే రోజున రెండు సినిమాలను విడుదల చేయడమే కాకుండా, ఆ రెండు చిత్రాలనూ విజయవంతమైన సినిమాలుగా నిలబెట్టిన ఘనత మైత్రి మూవీ మేకర్స్ సొంతం చేసుకుంది.
2023 సంక్రాంతి సందర్భంగా ‘వీరసింహారెడ్డి’, ‘వాల్తేరు వీరయ్య’ చిత్రాలను ఒకే సమయంలో ప్రేక్షకుల ముందుకు తీసుకొచ్చిన మైత్రి మూవీ మేకర్స్, రెండు సినిమాలతోనూ మంచి విజయాన్ని అందుకుంది. ఆ తర్వాత 2025 ఏప్రిల్లో ‘గుడ్ బ్యాడ్ అగ్లీ’, ‘జాట్’ చిత్రాలను ఒకే విడుదల సమయంలో తీసుకొచ్చింది. ఈ రెండు సినిమాలు కూడా బాక్సాఫీస్ వద్ద సత్తా చాటాయి.
ఇక 2026 ఆగస్టులో ‘ఇరుముడి’, ‘మొధ రాత్రి’ చిత్రాలను ఒకే రోజున విడుదల చేస్తూ మరోసారి ఇదే సక్సెస్ ట్రాక్ను కొనసాగించింది. దీంతో మూడు వేర్వేరు సందర్భాల్లో ఒకే రోజున రెండు సినిమాలను విడుదల చేసి, మొత్తం ఆరు చిత్రాలతో విజయాలను అందుకున్న నిర్మాణ సంస్థగా మైత్రి మూవీ మేకర్స్ ప్రత్యేక గుర్తింపు సంపాదించుకుంది.
ఇలా వరుసగా మూడు సందర్భాల్లో డబుల్ సక్సెస్ను నమోదు చేయడం సాధారణ విషయం కాదు. ఒకే రోజున రెండు సినిమాలను విడుదల చేయడం, వాటికి సరైన ప్రమోషన్ అందించడం, ప్రేక్షకుల నుంచి మంచి స్పందన వచ్చేలా కంటెంట్ను ఎంపిక చేసుకోవడం వెనుక నిర్మాణ సంస్థ ప్లానింగ్ కీలకంగా నిలిచింది.
మొత్తానికి ఒకే తేదీన రెండు సినిమాలను విడుదల చేసి, ఆ రెండు చిత్రాలతోనూ విజయాలను అందుకోవడం ద్వారా మైత్రి మూవీ మేకర్స్ ఇండియన్ సినిమా ఇండస్ట్రీలో ఆసక్తికరమైన రికార్డును సొంతం చేసుకుంది. ఇక ముందు కూడా ఈ బ్యానర్ నుంచి ఇలాంటి మరిన్ని సక్సెస్ఫుల్ కాంబినేషన్స్ వస్తాయా అనేది ఆసక్తికరంగా మారింది.
