కోలీవుడ్ స్టార్ హీరో సూర్య, దర్శకుడు హెచ్. వినోద్ కాంబినేషన్లో తెరకెక్కనున్న కొత్త సినిమాపై ఆసక్తికరమైన వార్తలు వినిపిస్తున్నాయి. ఈ భారీ యాక్షన్ ఎంటర్టైనర్లో టాలీవుడ్ కింగ్ అక్కినేని నాగార్జున కీలక పాత్రలో కనిపించనున్నారనే టాక్ ప్రస్తుతం సినీ వర్గాల్లో చక్కర్లు కొడుతోంది.
ప్రస్తుతం ప్రీ-ప్రొడక్షన్ పనులు జరుగుతున్న ఈ సినిమాకు సంబంధించి నాగార్జునను Nagarjuna చిత్రబృందం సంప్రదించినట్లు సమాచారం. ఆయన కూడా ఈ ప్రాజెక్ట్పై ఆసక్తి చూపించినట్లు తెలుస్తోంది. అన్నీ అనుకున్నట్లు జరిగితే త్వరలోనే నాగార్జున ఎంట్రీపై అధికారిక ప్రకటన వచ్చే అవకాశం ఉందని టాక్.
సూర్య, జ్యోతికలకు చెందిన ‘జగరమ్ స్టూడియోస్’ ఈ చిత్రాన్ని నిర్మించనుంది. సినిమాలో హీరోయిన్ పాత్ర కోసం వామికా గబ్బి పేరును పరిశీలిస్తున్నట్లు తెలుస్తోంది. సూర్య, హెచ్. వినోద్ కాంబినేషన్లో వస్తున్న ఈ ప్రాజెక్ట్ ఇప్పటికే అంచనాలు పెంచుతుండగా, నాగార్జున కూడా భాగమైతే సినిమాపై హైప్ మరింత పెరిగే అవకాశం ఉంది.
ఇక నాగార్జున విషయానికి వస్తే, ఇటీవల రజినీకాంత్ హీరోగా నటించిన ‘కూలీ’లో కీలకమైన నెగెటివ్ షేడ్స్ ఉన్న పాత్రలో కనిపించి ఆకట్టుకున్నారు. ప్రస్తుతం తన కెరీర్లో ఎంతో ప్రతిష్టాత్మకంగా తెరకెక్కుతున్న 100వ చిత్రం ‘కింగ్ 100’పై ఫోకస్ పెట్టారు.
మరోవైపు సూర్య కూడా తన చేతిలో ఉన్న ప్రాజెక్టులను పూర్తి చేసిన తర్వాతే హెచ్. వినోద్ సినిమాను సెట్స్పైకి తీసుకెళ్లనున్నట్లు తెలుస్తోంది. దీంతో ఈ క్రేజీ కాంబినేషన్ ఎప్పుడు పట్టాలెక్కుతుందనే ఆసక్తి నెలకొంది.
సూర్య, నాగార్జున కలిసి ఒకే సినిమాలో కనిపిస్తే టాలీవుడ్, కోలీవుడ్ ప్రేక్షకులకు ఇది నిజంగానే స్పెషల్ ట్రీట్గా మారే అవకాశం ఉంది. మరి నాగార్జున ఈ తమిళ ప్రాజెక్ట్కు గ్రీన్ సిగ్నల్ ఇస్తారా? అధికారిక ప్రకటన వచ్చే వరకు వేచి చూడాల్సిందే.
