రజినీకాంత్ వశీకర్ గా, రోబో గా నటిస్తున్న భారీ గ్రాఫిక్స్ తో కూడిన సైన్స్ ఫిక్షన్ చిత్రం ‘రోబో 2.0’ హాట్ టాపిక్ గా మారింది. రజిని అభిమానులంతా ఎప్పుడెప్పుడూ థియేటర్లలోకి వస్తుందా, ఎప్పుడెప్పుడూ చూసెయ్యాలా అని ఎదురుచూస్తున్న ఈ సినిమా వచ్చే గురువారం అనగా నవంబర్ 29 న ప్రపంచవ్యాప్తంగా తెలుగు, తమిళ, హిందీ భాషల్లో విడుదల అవ్వబోతుంది. ఈ సందర్భంగా ఈ సినిమాకి సంబంధించిన రెండు కొత్త పోస్టర్లని మేకర్స్ విడుదల చేసారు.
ఒక పోస్టర్లో పరుగెడుతున్న రజినీకాంత్ తో పాటు, అతని వెనుక ఆటోల మీదనుండి దూకుతున్న మరో హ్యూమనోయిడ్ రోబో పాత్రలో అమీ జాక్సన్ కూడా విన్యాసాలు చేస్తుంది. ఈ సినిమాలో బాలీవుడ్ నటుడు అక్షయ్ కుమార్ విలన్ గా నటిస్తుండగా, ఈ సినిమా తెలుగు హక్కులను దాదాపు 80 కోట్లకి దిల్ రాజు మరియు ఇంకో ఇద్దరు నిర్మాతలు కలిసి దక్కించుకొని, తెలుగులో 1200 స్క్రీన్లలో విడుదలచేయబోతున్నారు. ఏ. ఆర్. రెహ్మాన్ అందించిన సంగీతం ఒక మోస్తరుగా ఉండడంతో పాటలు ఇంకా ఎవరికి ఎక్కలేదు. ఈ సినిమా భారీ విజయం ఖాయం అని నిర్మాతలు చెప్తున్నారు.
