దక్షిణాది సినీ పరిశ్రమలో ప్రస్తుతం పెద్ద మార్పుల గాలి వీస్తోంది. ముఖ్యంగా కోలీవుడ్లో గత కొన్ని దశాబ్దాలుగా అగ్రస్థానాన్ని ఆక్రమించిన స్టార్ హీరోల ప్రభావం క్రమంగా తగ్గుతోంది. విజయ్(Vijay) రాజకీయ ప్రస్థానంపై ఫుల్ ఫోకస్ పెట్టడంతో సినిమాలకు దూరమవడం కీలక మలుపు. రజనీకాంత్ వయస్సు కారణంగా సినిమాల వేగం తగ్గించగా, కమల్ హాసన్ సినిమా–రాజకీయం మధ్య సమతౌల్యం పాటిస్తున్నారు. అజిత్ కుమార్ వ్యక్తిగత ఆసక్తులకే ఎక్కువ ప్రాధాన్యం ఇస్తున్నారు. మరోవైపు సూర్య, ధనుష్, విక్రమ్ లాంటి టాలెంటెడ్ నటులు సరైన బ్లాక్బస్టర్ కోసం ఎదురుచూస్తున్నారు. ఈ పరిణామాలన్నీ కలిసి కోలీవుడ్లో ఒక స్టార్ పవర్ ఖాళీని సృష్టిస్తున్నాయి.
కోలీవుడ్ అంటే మాస్ గేమ్
తమిళనాట ‘నెంబర్ వన్’ స్థానం అంటే కేవలం కలెక్షన్లు కాదు, గట్టిపడిన మాస్ ఫాలోయింగ్ కావాలి. విజయ్ తర్వాత ఆ స్థాయిలో మాస్ పల్స్ను పటిష్టంగా పట్టుకున్న హీరో ప్రస్తుతం కనిపించడం లేదు. ఇదే సమయంలో టాలీవుడ్ హీరోలు పాన్ ఇండియా ఇమేజ్తో దూసుకుపోతున్నారు. ఇప్పటికే తెలుగు సినిమాలకు తమిళనాట మంచి ఆదరణ ఉంది. ఈ గ్యాప్ను సరైన ప్లానింగ్తో భర్తీ చేస్తే, కోలీవుడ్ మార్కెట్పై టాలీవుడ్ ఆధిపత్యం సాధ్యమనే అభిప్రాయం వినిపిస్తోంది.
ముందంజలో అల్లు అర్జున్, ప్రభాస్
తమిళ దర్శకుల క్రేజ్ను సమర్థంగా ఉపయోగించుకుంటున్న హీరోగా అల్లు అర్జున్ ముందున్నారు. అట్లీ, లోకేష్ కనకరాజ్ వంటి తమిళ నాడి తెలిసిన దర్శకులతో సినిమాలు చేయడం బన్నీకి కోలీవుడ్లో బలమైన పట్టు తెచ్చే అవకాశం ఉంది. ప్రమోషన్లలో తమిళంలో మాట్లాడటం, తాను చెన్నై కిడ్ అని చెప్పుకోవడం ద్వారా తమిళ ప్రేక్షకులకు మరింత దగ్గరయ్యారు.
ఇక ప్రభాస్ ‘బాహుబలి’ నుంచే కోలీవుడ్లో గట్టి పునాది వేసుకున్నారు. ఆయన భారీ బడ్జెట్ సినిమాలు తమిళ బాక్సాఫీస్ను షేక్ చేసే స్థాయిలో ఉన్నాయి.
పర్ఫెక్ట్ టైమింగ్
రామ్ చరణ్, జూనియర్ ఎన్టీఆర్ లకు ఆర్ ఆర్ ఆర్ ద్వారా కోలీవుడ్లోనూ మంచి క్రేజ్ వచ్చింది. శంకర్ తో చరణ్ చేసిన గేమ్ ఛేంజర్ ఆశించిన స్థాయిలో ఆడితే మార్కెట్ మరింత బలపడేది. ప్రస్తుతం చరణ్ చేస్తున్న పెద్ది, తారక్ చేస్తున్న ప్రశాంత్ నీల్ సినిమా తమిళ ప్రేక్షకులను మెప్పిస్తే, అక్కడ వీరికి స్వంత మార్కెట్ ఖాయం అంటోంది ట్రేడ్.
అలాగే మహేష్ బాబు నటిస్తున్న వారణాసి కనీసం హిట్ టాక్ తెచ్చుకున్నా, ఆయనకూ కోలీవుడ్లో మంచి మార్కెట్ ఓపెన్ అవుతుందన్న అంచనాలు ఉన్నాయి.
స్టార్ పవర్ ఎవరిది?
తమిళ సినీ చరిత్రలో ఎప్పుడూ లేనంతగా ఇప్పుడు అక్కడ స్టార్ పవర్ కొరత కనిపిస్తోంది. మన హీరోలు డబ్బింగ్ సినిమాలకే పరిమితం కాకుండా, నేరుగా తమిళ దర్శకులతో సినిమాలు చేస్తూ, అక్కడి ప్రమోషన్లపై దృష్టి పెడితే కోలీవుడ్లో పట్టు సాధించడం ఖాయం. రాజకీయ వేక్యూమ్ను విజయ్ ఎలా క్యాష్ చేసుకున్నాడో, అలాగే కోడంబాక్కంలో కనిపిస్తున్న స్టార్ గ్యాప్ను టాలీవుడ్ హీరోలు క్యాష్ చేసుకోగలిగితే, మళ్లీ తమిళ నేలపై తెలుగు హీరోల జెండాలు రెపరెపలాడే రోజులు దూరంలో లేవని సినీ విశ్లేషకులు అంటున్నారు.