బాలీవుడ్ స్టార్ రణ్బీర్ కపూర్, సాయి పల్లవి ప్రధాన పాత్రల్లో దర్శకుడు నితీశ్ తివారీ తెరకెక్కిస్తున్న ప్రతిష్టాత్మక చిత్రం ‘రామాయణ’. భారీ బడ్జెట్తో అంతర్జాతీయ స్థాయిలో రూపొందుతున్న ఈ సినిమాపై ఇప్పటికే దేశవ్యాప్తంగా భారీ అంచనాలు నెలకొన్నాయి. సినిమా ప్రమోషన్స్ కూడా క్రమంగా వేగం పుంజుకుంటున్నాయి.
ఇటీవల వినాయక చవితి సందర్భంగా ‘రామాయణ’ నుంచి తొలి పాట ‘జయ జయ రామ్’ను విడుదల చేశారు. ఏఆర్ రెహమాన్ స్వరపరిచిన ఈ పాటను అర్జిత్ సింగ్, శ్రేయా ఘోషల్ ఆలపించారు. విడుదలైన వెంటనే ఈ భక్తి గీతం ప్రేక్షకుల నుంచి మంచి స్పందనను అందుకుంది.
‘రామాయణ: పార్ట్ 1’ను దీపావళి సందర్భంగా ప్రపంచవ్యాప్తంగా విడుదల చేసేందుకు మేకర్స్ సిద్ధమవుతున్నారు. నమిత్ మల్హోత్రాతో కలిసి కన్నడ స్టార్ యశ్ ఈ చిత్ర నిర్మాణంలో భాగస్వామిగా ఉన్నారు. సినిమాలో యశ్ రావణుడి పాత్రలో, సన్నీ డియోల్ హనుమంతుడిగా, రవి దూబే లక్ష్మణుడిగా కనిపించనున్నారు.
ఇదిలా ఉంటే, ‘రామాయణ’ Ramayana ఇంగ్లీష్ వెర్షన్కు సంబంధించి సోషల్ మీడియాలో ఓ ఆసక్తికరమైన వార్త వైరల్ అవుతోంది. హిందీ వెర్షన్తో పోలిస్తే ఇంగ్లీష్ వెర్షన్ రన్టైమ్ను సుమారు 30 నిమిషాల వరకు తగ్గించినట్లు ప్రచారం జరుగుతోంది.
అంతర్జాతీయ ప్రేక్షకుల కోసం ప్రత్యేకంగా ఇంగ్లీష్ వెర్షన్ను రూపొందిస్తూ, పాటలు సహా కొన్ని సన్నివేశాలను ట్రిమ్ చేసినట్లు నెట్టింట చర్చ జరుగుతోంది. విదేశీ ప్రేక్షకుల అభిరుచులు, సినిమా రన్టైమ్ వంటి అంశాలను దృష్టిలో పెట్టుకుని ఈ మార్పులు చేసినట్లు ప్రచారం ఉన్నప్పటికీ, దీనిపై ఇప్పటివరకు చిత్రబృందం నుంచి ఎలాంటి అధికారిక ధృవీకరణ రాలేదు.
కాబట్టి ఇంగ్లీష్ వెర్షన్ నిజంగానే 30 నిమిషాల వరకు తక్కువగా ఉంటుందా? పాటలు, సన్నివేశాల్లో మార్పులు చేశారా? అనే విషయాలపై ప్రస్తుతం స్పష్టత లేదు. మేకర్స్ నుంచి అధికారిక ప్రకటన వచ్చిన తర్వాతే ఈ వార్తల్లో నిజానిజాలు తెలియనున్నాయి.
