మాస్ మహారాజా రవితేజ (Ravi Teja) కథానాయకుడిగా శివ నిర్వాణ దర్శకత్వంలో తెరకెక్కుతున్న ‘ఇరుముడి’ చిత్రం విడుదలకు సిద్ధమవుతోంది. ఈ సినిమా ఆగస్టు 21న ప్రేక్షకుల ముందుకు రానుంది. ఈ నేపథ్యంలో చిత్రబృందం ప్రమోషన్స్లో భాగంగా రవితేజ యాంకర్ సుమతో ప్రత్యేకంగా ఇంటర్వ్యూ నిర్వహించింది.
ఈ సందర్భంగా రవితేజను బయట ఎక్కువగా కనిపించకపోవడానికి కారణమేంటని సుమ ప్రశ్నించారు. విజయ్ దేవరకొండ–రష్మిక రిసెప్షన్కు రవితేజ చాలా సింపుల్గా హాజరయ్యారని, అది కూడా సోషల్ మీడియాలో వైరల్గా మారిందని ప్రస్తావిస్తూ.. మీరు ఫంక్షన్స్కు ఎందుకు తక్కువగా వస్తారని అడిగారు.
దీనికి రవితేజ తనదైన శైలిలో స్పందించారు. “నాకు బయటకు రావడం, ఫంక్షన్స్కు వెళ్లడం పెద్దగా నచ్చదు. అది నా నేచర్. దానికి ప్రత్యేకంగా వేరే కారణం ఏమీ లేదు” అని స్పష్టం చేశారు.
ఇక ‘ఇరుముడి’లో రవితేజ తన కెరీర్లోనే విభిన్నమైన పాత్రలో కనిపించనున్నట్లు తెలుస్తోంది. ఇప్పటివరకు చూసిన రెగ్యులర్ మాస్ హీరో ఇమేజ్కు భిన్నంగా భావోద్వేగాలతో కూడిన పాత్రను ఆయన పోషిస్తున్నారు. ముఖ్యంగా తండ్రి–కుమార్తె మధ్య సాగే భావోద్వేగ సన్నివేశాలు సినిమాకు ప్రధాన ఆకర్షణగా నిలవనున్నాయని సమాచారం.
ఈ చిత్రంలో ప్రియా భవానీ శంకర్ కథానాయికగా నటిస్తుండగా, బేబీ నక్షత్ర రవితేజ కుమార్తె పాత్రలో కనిపించనుంది. భక్తి, కుటుంబ భావోద్వేగాలు, యాక్షన్ అంశాలను మేళవించి ఈ చిత్రాన్ని తెరకెక్కిస్తున్నారు. తమిళంలో ‘ఇరుముడికట్టు’ పేరుతో ఈ సినిమా విడుదల కానుంది.
మైత్రీ మూవీ మేకర్స్ నిర్మిస్తున్న ఈ చిత్రానికి జీవీ ప్రకాశ్ కుమార్ సంగీతం అందిస్తున్నారు. ఆగస్టు 21న ప్రేక్షకుల ముందుకు రానున్న ‘ఇరుముడి’పై ఇప్పటికే మంచి అంచనాలు నెలకొన్నాయి.
