టాలీవుడ్లో డిఫరెంట్ స్క్రీన్ప్లేలు, కొత్త ఆలోచనలతో సెన్సిబుల్ డైరెక్టర్గా తనకంటూ ప్రత్యేక గుర్తింపు తెచ్చుకున్నాడు వివేక్ ఆత్రేయ. ‘మెంటల్ మదిలో’, ‘బ్రోచేవారెవరురా’, ‘అంటే సుందరానికీ’, ‘సరిపోదా శనివారం’ వంటి సినిమాలతో విమర్శకుల ప్రశంసలు అందుకోవడమే కాకుండా బాక్సాఫీస్ దగ్గర కూడా గౌరవప్రదమైన ఫలితాలు సాధించాడు. ముఖ్యంగా ‘సరిపోదా శనివారం’లో నానిని మాస్ అవతార్లో చూపించడం, ఎస్ జే సూర్య పాత్రను పవర్ఫుల్గా డిజైన్ చేయడం వివేక్ను నెక్స్ట్ లెవెల్కు తీసుకెళ్లింది.
ఈ సినిమా తర్వాత వివేక్ ఆత్రేయ నెక్స్ట్ ప్రాజెక్ట్ ఏ హీరోతో ఉంటుందన్నది ఇండస్ట్రీలో హాట్ టాపిక్గా మారింది. ఒక దశలో నందమూరి బాలకృష్ణతో సినిమా ఫిక్స్ అయ్యిందనే టాక్ బలంగా వినిపించింది. కానీ ఆలోపే కథ మలుపు తిరిగింది. తాజాగా వివేక్ ఆత్రేయ – రవితేజ కాంబినేషన్పై చర్చలు ఊపందుకోవడంతో, బాలయ్య కోసం అనుకున్న కథనే ఇప్పుడు రవితేజకు షిఫ్ట్ చేశాడేమో అన్న ఊహాగానాలు మొదలయ్యాయి.
అయితే ఇన్సైడ్ టాక్ ప్రకారం అసలు విషయం వేరేలా ఉంది. బాలకృష్ణ కోసం వివేక్ రాసుకున్న పవర్ఫుల్ స్క్రిప్ట్ను ఆయన అలాగే పక్కన పెట్టాడట. అనుకోకుండా బాలయ్య – కొరటాల శివ ప్రాజెక్ట్ లైన్లోకి రావడంతో, ఆ స్క్రిప్ట్ను తాత్కాలికంగా హోల్డ్లో పెట్టమని చెప్పినట్టు సమాచారం. అంటే ఆ కాంబో భవిష్యత్తులో ఉండే అవకాశాలు ఇంకా ఉన్నాయి.
ఈ గ్యాప్లో తన దగ్గర ఉన్న మరో స్ట్రాంగ్ స్క్రిప్ట్తో రవితేజను అప్రోచ్ అయ్యాడని టాక్. రవితేజ ఎనర్జీకి, మాస్ ఇమేజ్కు పర్ఫెక్ట్గా మ్యాచ్ అయ్యే కథ ఇది అని ఇండస్ట్రీలో వినిపిస్తోంది. ప్రస్తుతం శివ నిర్వాణ దర్శకత్వంలో ‘ఇరుముడి’ షూటింగ్ పూర్తి అయిన వెంటనే, వివేక్ ఆత్రేయ – రవితేజ ప్రాజెక్ట్ సెట్స్పైకి వెళ్లే ఛాన్స్ ఉందట.
మరి ఈ కాంబినేషన్ ఏ రేంజ్లో వర్కౌట్ అవుతుందో… కొద్దిరోజుల్లో క్లారిటీ రావాల్సిందే!