తెలంగాణ ముఖ్యమంత్రి కేసీఆర్ చాలారోజుల తర్వాత హస్తిన పర్యటనకు వెళ్లనున్నారు. బుధవారం నుంచి మూడు రోజుల పాటు దేశ రాజధాని దిల్లీలో ఆయన పర్యటించనున్నారు. సెప్టెంబరు 1న మధ్యాహ్నం ప్రత్యేక విమానంలో దిల్లీకి వెళ్తారు. 2వ తేదీ మధ్యాహ్నం 12:30 గంటలకు దిల్లీ వసంత్‌విహార్‌ మెట్రోస్టేషన్‌ సమీపంలోని 1300 గజాల స్థలంలో టీఆర్ఎస్ పార్టీ కార్యాలయ నిర్మాణ పనులకు భూమి పూజ చేయనున్నారు.
ఈ కార్యక్రమంలో తెలంగాణ మంత్రులు, టీఆర్ఎస్ ఎమ్మెల్యేలు, ఎమ్మెల్సీలు, లోక్‌సభ, రాజ్యసభ సభ్యులు, పార్టీ ప్రధాన కార్యదర్శులు, ఇతర నేతలు పాల్గొంటారు. ఆ రోజు రాత్రికి ఢిల్లీలోనే బస చేయనున్న కేసీఆర్ మూడో తేదీన తిరిగి హైదరాబాద్‌కు రానున్నారు. ఈ పర్యటనలో అనుమతి లభిస్తే రాష్ట్రపతి రామ్‌నాథ్ కోవింద్, ప్రధానమంత్రి నరేంద్ర మోదీ సహా పలువురు కేంద్రమంత్రులను కలిసే అవకాశం ఉంది.