ప్రత్యేక హోదా కోసం ఏపీలో నిరసనలు చేపడుతున్న సంగతి తెలిసిందే. అయితే ఆ నిరసనలు ఇప్పుడు ఆత్మాహుతి దాకా వెళ్ళడం కలకలం రేపుతున్నాయి. ఇటీవల ప్రత్యేక హోదా కోరుతూ ఒక యువకుడు తనువూ చాలించిన ఘటన మరువక ముందే ఈ రోజు అనంతపురం జిల్లా ధర్మవరంలో పెనుబోలు విజయభాస్కర్ అనే ఓ మున్సిపల్ ఉద్యోగి సెల్ టవర్ ఎక్కాడు.
ఏపీకి ప్రత్యేక హోదా ఇవ్వాలని, లేకపోతే టవర్ పై నుంచి దూకి ఆత్మహత్య చేసుకుంటానని నినాదాలు చేస్తున్నాడు. రెండు మూడు సార్లు కిందకి దూకే ప్రయత్నం కూడా చేయడంతో ఆ ప్రాంతమంతా ఉద్విగ్న పరిస్థితులు నెలకొన్నాయి. అయితే అక్కడకు చేరుకున్న పోలీసులు, అధికారులు అతనికి నచ్చజెప్పే ప్రయత్నం చేస్తున్నారు. కేంద్రం ఆంధ్రప్రదేశ్‌కు ప్రత్యేక హోదా ప్రకటించకపోతే కిందకి దూకి ఆత్మహత్య చేసుకుంటానని విజయ్‌ హెచ్చరిస్తున్నాడు.
