ఇండియన్ సినిమాను గ్లోబల్ స్థాయికి తీసుకెళ్లే ప్రాజెక్ట్స్లో ఇప్పుడు అందరి చూపు ఒక్కచోటే నిలిచింది. సూపర్ స్టార్ మహేష్ బాబు మరియు గ్లోబల్ డైరెక్టర్ ఎస్ ఎస్ రాజమౌళి కలయికలో తెరకెక్కుతున్న భారీ చిత్రం వారణాసి (Varanasi). ఈ సినిమా నుంచి విడుదలైన కాన్సెప్ట్ టీజర్ ఒక్కటే సరిపోయింది అంచనాలను ఆకాశానికి ఎగరేసేందుకు.
ఆ టీజర్లోనే రామాయణానికి సంబంధించిన కీలక ఘట్టాన్ని టచ్ చేస్తూ, కథా విస్తృతి ఎంతదూరం వెళ్తుందో స్పష్టమైన సంకేతం ఇచ్చారు. కానీ తాజాగా సినిమాకు కథ అందిస్తున్న, జక్కన్న తండ్రి వి. విజయేంద్ర ప్రసాద్ చేసిన బిగ్ రివీల్ ఇప్పుడు సోషల్ మీడియాలో చర్చల తుఫాన్ రేపుతోంది. రామాయణ ఎపిసోడ్లో యుద్ధం కేవలం రాముడు మరియు కుంభకర్ణుడి మధ్యే జరుగుతుందని ఆయన క్లారిటీ ఇచ్చారు.
ఇప్పటివరకు చాలామంది ఈ ఘట్టంలో రావణుడి పాత్ర కూడా ఉంటుందని ఊహించుకున్నారు. కానీ ఇది పూర్తిగా రాముడు–కుంభకర్ణుడి మధ్య జరిగే శక్తివంతమైన సన్నివేశమని తేలిపోయింది. ఇక్కడే ఒక ఇంట్రెస్టింగ్ థియరీ పుట్టుకొస్తోంది. ఈ సినిమాలో విలన్ పాత్రను వెర్సటైల్ నటుడు పృథ్వీరాజ్ సుకుమారన్ పోషిస్తున్న విషయం తెలిసిందే.
ఇప్పుడు గమనిస్తే, పురాణ కాలంలో కుంభకర్ణుడు… భవిష్యత్ ప్రపంచంలో పృథ్వీరాజ్ పాత్ర పేరు ‘కుంభ’. అక్కడ కుంభకర్ణుడు, ఇక్కడ కుంభ. ఈ పేర్ల లింక్ యాదృచ్ఛికమా, లేక ప్లాన్ చేసిన కథా సంకేతమా అనే సందేహం సహజంగా తలెత్తుతోంది. మరి ‘కుంభ’ కంటే కూడా శక్తివంతమైన మరో విలన్ ఈ కథలో దాగి ఉన్నాడా? అన్న ప్రశ్నకు ఇదే బీజం.
ఇలాంటి స్ట్రక్చర్ మనం ఇప్పటికే కల్కి 2898 ఎడి లో చూశాం. ప్రభాస్ నటించిన ఆ సినిమాలో నాగ్ అశ్విన్ కథనానికి మరో లేయర్ జోడించారు. యూనివర్సల్ స్టార్ కమల్ హాసన్ పోషించిన సుప్రీమ్ యాస్కిన్ అత్యంత శక్తివంతమైన విలన్గా కనిపించినప్పటికీ, అతనికంటే మించిన, కనిపించని మరో శక్తి ‘కలి’ రూపంలో ఉండొచ్చన్న థియరీ కూడా బలంగా వినిపించింది.
అలాగే ‘వారణాసి’లో కూడా మనకి ఇప్పటివరకు చూపించిన విలన్లకు మించి ఇంకెంత పెద్ద సర్ప్రైజ్ దాగి ఉందో అనే ఉత్కంఠ పెరుగుతోంది. పురాణం, భవిష్యత్, మిథాలజీ, సైన్స్ ఫిక్షన్ అన్నీ కలిసిన ఈ కథల్లో అసలు మాస్టర్ కార్డు ఏదో… కాలమే నెమ్మదిగా బయటపెట్టాలి.