దర్శకుడు శ్రీకాంత్ ఓదెల తెరకెక్కిస్తున్న ‘ది ప్యారడైజ్’ సినిమాపై ఇప్పటికే భారీ అంచనాలు ఉన్నాయి. తాజాగా ఈ చిత్రం నుంచి విడుదలైన ‘ఏషనాగుల’ Yeshanagula పాట యూట్యూబ్తో పాటు సోషల్ మీడియాలోనూ సెన్సేషన్గా మారింది. తెలంగాణ జానపద శైలిలో సాగిన ఈ పాటకు కాసర్ల శ్యామ్ సాహిత్యం అందించగా.. తెలంగాణ పల్లె భాషలోని స్వచ్ఛమైన పదాలతో రాసిన లిరిక్స్ ప్రేక్షకులను విశేషంగా ఆకట్టుకుంటున్నాయి.
పాట విడుదలైనప్పటి నుంచి ఇందులోని ఒక్కో పదానికి అర్థం ఏంటో తెలుసుకునేందుకు నెటిజన్లు ఆసక్తి చూపిస్తున్నారు. ఈ నేపథ్యంలో ఓ ఇంటర్వ్యూలో కాసర్ల శ్యామ్ ‘ఏషనాగుల’ పాట వెనుక ఉన్న కథతో పాటు లిరిక్స్లోని అంతరార్థాన్ని వివరించారు.
‘ఏషనాగుల’ అనేది తెలంగాణ పల్లెల్లో తరతరాలుగా వినిపిస్తున్న ఓ కోలాటం జానపద గీతం. గాయకుడు జంగిరెడ్డి ద్వారా ప్రజల్లోకి వెళ్లిన ఈ జానపద బాణీని ‘ది ప్యారడైజ్’లోని ఓ ప్రత్యేక సన్నివేశం కోసం దర్శకుడు శ్రీకాంత్ ఓదెల ఎంచుకున్నట్లు కాసర్ల శ్యామ్ తెలిపారు. ఈ పాటను సినిమాలో ఉపయోగించేందుకు జంగిరెడ్డి నుంచి అవసరమైన అనుమతులు, హక్కులు తీసుకున్న తర్వాతే చిత్రంలో చేర్చినట్లు వెల్లడించారు.
ఈ పాటలో ఎలాంటి గ్లామర్కు చోటివ్వకుండా.. 80–90ల నాటి తెలంగాణ పల్లెల్లో కనిపించే స్వచ్ఛమైన విరహం, సహజమైన ప్రేమ, గ్రామీణ జీవనశైలిని ఆవిష్కరించేలా సాహిత్యాన్ని రూపొందించినట్లు శ్యామ్ చెప్పారు.
పాటలోని తెలంగాణ పదాలకు అర్థం ఇదే!
“జిమ్మేదారి పటేలో.. గల్మకాడ నీకోసం ముగ్గునైతిరో”
ఇక్కడ ‘జిమ్మేదారి’ అంటే బాధ్యత తీసుకున్న వ్యక్తి. ‘గల్మ’ అంటే గడప లేదా వాకిలి. అంటే.. తన బాధ్యత తీసుకున్న ప్రియుడి కోసం వేకువజామునే గడప దగ్గర ముగ్గులా ఎదురుచూస్తున్నానని నాయిక తన ఆరాటాన్ని వ్యక్తం చేస్తోంది.
“నీ తవ్వల నా చూపులు కావలున్నాయో”
‘తవ్వ’ అంటే దారి. ప్రియుడు వచ్చే దారిలోనే తన చూపులను కాపలాగా పెట్టి అతని రాక కోసం ఎదురుచూస్తున్నాననే భావాన్ని ఈ పదాల్లో వ్యక్తం చేశారు.
“అర్రల గుడ్డి దీపమయిందిర పానం”
‘అర్ర’ అంటే గది. చీకటి గదిలో ఆరిపోవడానికి సిద్ధంగా ఉన్న మినుకు మినుకుమనే దీపంలా తన ప్రాణం కూడా విరహంతో ఉక్కిరిబిక్కిరి అవుతోందని నాయిక చెబుతోంది.
“బుడపరకల కూర వండిన నీకోసం బుడిమట్ల బువ్వతోని”
‘బుడపరకలు’ అంటే పల్లెటూర్లలో తినే చిన్న చేపలు. వాటితో కూర వండి, బుడమ వడ్లతో చేసిన అన్నంతో ప్రియుడి కోసం భోజనం సిద్ధం చేసి.. ప్రేమగా వచ్చి తినమని నాయిక పిలుస్తోంది.
“నీ సెమటలు దుడుసుకున్న నా వాయిల్ సీరా సింగులే సిక్కుల బడెరా”
ప్రియుడు అలసిపోయిన సమయంలో తన చీర కొంగుతో అతని చెమటను తుడిచిన సాన్నిహిత్యాన్ని నాయిక గుర్తుచేసుకుంటోంది. ఆ జ్ఞాపకాల్లో మునిగిపోయి చీర కుచ్చిళ్లు కూడా సరిగ్గా కట్టుకోలేకపోతున్నాననే భావాన్ని ఇందులో కవితాత్మకంగా చెప్పారు.
“జబ్బల రైక ఉక్కులే ఉట్టుట్టిగా తెగిపోయినాయిరా”
ప్రియుడి కౌగిలింత, అతని స్పర్శను గుర్తుచేసుకున్నప్పుడు నాయికలో కలిగే భావోద్వేగాన్ని ఎలాంటి అసభ్యత లేకుండా ఎంతో సహజంగా, కవితాత్మకంగా ఈ లైన్లో వ్యక్తం చేశారు.
“నీ వాసన మోసిన నా వళ్ళు.. ఎన్నడో మరిసిపాయే ఎచ్చటి నీళ్ళు”
ప్రియుడి పరిమళం, చెమట వాసన తన శరీరానికి అంటుకుందని.. ఆ మధురమైన జ్ఞాపకాన్ని పోగొట్టుకోవడం ఇష్టం లేక వెచ్చని నీళ్లతో స్నానం చేయడం కూడా మానేశాననే భావాన్ని ఈ పదాలు చెబుతున్నాయి.
“ఇరుకు ఇల్లు ఏరుకుంటాందిరని ఎంగిలి పూలు”
తన చిన్న ఇరుకు ఇంటి ప్రతి మూలలోనూ ప్రియుడి జ్ఞాపకాలు, అతని ఆనవాళ్లు నిండిపోయాయని నాయిక భావిస్తోంది. ఇంట్లో కనిపించే ప్రతి వస్తువు అతని స్పర్శను గుర్తుచేస్తూ విరహాన్ని మరింత పెంచుతున్నట్లు ఈ లైన్లో చెబుతున్నారు.
ఇలా చూస్తే ‘ఏషనాగుల’ పాట కేవలం ఓ జానపద గీతం మాత్రమే కాదు.. తెలంగాణ పల్లె జీవితం, స్థానిక భాష, సంప్రదాయ పదాలు, స్వచ్ఛమైన ప్రేమ, విరహ వేదనను కలిపిన ఓ అందమైన భావప్రపంచం అని అర్థమవుతుంది. కాసర్ల శ్యామ్ ఉపయోగించిన తెలంగాణ పల్లె పదాలే ఈ పాటకు మరింత ప్రత్యేకతను తీసుకొచ్చాయి.
