విమానాశ్ర‌యాల నుంచి దాదాపు దేశ‌వ్యాప్తంగా దేశీయ విమాన స‌ర్వీసులు ప్రారంభమైన విషయం తెలిసిందే. అయితే కొన్ని చోట్ల ఉన్నట్లుండి ఒక్కసారిగా ఫ్ల‌యిట్ లను రద్దు చేసేశారు. దీంతో ప్రయాణికులు తీవ్ర అయోమ‌యానికి లోనౌతున్నారు. టికెట్ బుకింగ్ చేసుకుని ఎయిర్‌పోర్ట్ కి వ‌చ్చిన త‌ర్వాత.. ఫ్ల‌యిట్స్ రద్దు అయిన‌ట్లు వారికి స‌మాచారం అందిస్తున్నారు. దీంతో ఆ ప్రయాణికులు ఏం చేయాలో అర్థం కాని పరిస్థితి ఏర్పడింది. కాగా ముంబై విమానాశ్ర‌యం నుంచి పాట్నా వెళ్ల‌వ‌లిసిన విమానాన్ని ఈరోజు రద్దు చేశారు. ఉద‌యం ప్రారంభం కావాల్సిన ఆ ఫ్ల‌యిట్‌ను రద్దు చేశారు. దీంతో ఎయిర్‌పోర్ట్‌కు వ‌చ్చిన వారంతా షాక‌య్యారు.
అదే విధంగా బెంగుళూరులో కూడా ఇలాంటి స‌మ‌స్యే త‌లెత్తింది. బెంగుళూరు నుంచి హైద‌రాబాద్‌కు రావాల్సిన విమానాన్ని అక‌స్మాత్తుగా రద్దు చేశారు. ఎయిర్‌లైన్స్ నుంచి త‌మ‌కు ఎటువంటి స‌మాచారం లేద‌ని ప్రయాణికులు ఆందోళ‌న వ్య‌క్తం చేశారు. బోర్డింగ్ పాస్‌ల‌ను స్కానింగ్ చేస్తున్న స‌మ‌యంలో త‌మ విమానం రద్దు అయిన‌ట్లు సిబ్బంది తెలియ‌జేశార‌ని ఓ ప్ర‌యాణికుడు తీవ్ర ఆరోపణలు చేస్తున్నారు. అలాగే… ఢిల్లీ విమానాశ్ర‌యంలో ఈరోజు 80 ఫ్ల‌యిట్ల‌ను రద్దు చేశారు. దాంట్లో డిపార్చ‌ర్స్, అరైవ‌ల్స్ ఉన్నాయి. ముంబై విమానాశ్ర‌యంలో 25 టేకాఫ్‌లు, 25 ల్యాండిగ్స్‌కు అనుమ‌తి ఉంది. కాగా చెన్నైలో 25 ఫ్ల‌యిట్ల‌కు మాత్ర‌మే అరైవ‌ల్ అనుమ‌తి ఇచ్చింది ప్రభుత్వం.
