బంధువుల ఇంట పెళ్లి వేడుకల్లో ఉత్సాహంగా పాల్గొని.. నూతన వధూవరులను ఆశీర్వదించారు. స్నేహితులు, చుట్టాలతో ఆనందంగా గడిపి వివాహ వేడుక ముగిసిన తర్వాత తిరుగుపయనమయ్యారు. కానీ.. సంతోషం ఎంతోసేపు నిలవలేదు. అప్పటి వరకు పెళ్లిలో జరిగిన విషయాలను గుర్తుచేసుకుంటూ ఇంటికి వెళ్తున్న వారిని మృత్యువు వెంబడించింది. కళ్లు మూసి తెరిచేలోగా జరిగిన ప్రమాదంలో 14 మంది ప్రాణాలు కోల్పోయారు. ఈ విషాదకర సంఘటన ఉత్తరాఖండ్‌లో మంగళవారం తెల్లవారుజామున చోటుచేసుకుంది.
ఓ పెళ్లి బస్సు లోయలో పడి 14 మంది మృతి చెందగా.. మరో ఇద్దరు తీవ్రంగా గాయపడ్డారు. డెహ్రాడున్ సమీపంలోని బుడంలో బంధువుల ఇంట సోమవారం జరిగిన పెళ్లి వేడుకకు హాజరై తిరిగి వస్తుండగా బస్సు ప్రమాదానికి గురయ్యింది. దీంతో బస్సులో ప్రయాణిస్తున్న 14 మంది అక్కడిక్కడే మృతిచెందారు. మంగళవారం తెల్లవారుజామున సుఖిదాంగ్ రీతా సాహిబ్ రోడ్డుపై ఒక్కసారిగా బస్సు అదుపుతప్పి.. చంపావత్ లోయలోకి దూసుకెళ్లింది.
ఈ ప్రమాదంలో 14మంది అక్కడికక్కడే చనిపోగా.. మరో ఇద్దరికి తీవ్ర గాయాలయ్యాయని కుమావన్ డీఐజీ నిలేశ్ ఆనంద్ భర్నే అన్నారు. ఈ ఘటన గురించి సమాచారం అందుకున్న వెంటనే అక్కడకు చేరుకుని సహాయక చర్యలు చేపట్టామని తెలిపారు. అయితే, ఘటనా స్థలిలోనే 14 మంది చనిపోయారని వివరించారు. ప్రమాదంతో పెళ్లి ఇంట విషాదఛాయలు అలుముకున్నాయి. మృతుల కుటుంబ సభ్యులు కన్నీరుమున్నీరుగా విలపిస్తున్నారు.
ఉత్తరాఖండ్ ప్రమాదంపై ప్రధాని నరేంద్ర మోదీ స్పందిస్తూ.. తీవ్ర విచారం వ్యక్తం చేశారు. మృతుల కుటుంబాలకు తన ప్రగాఢ సానుభూతి తెలిపిన ప్రధాని.. క్షతగాత్రులకు మెరుగైన వైద్యం అందజేయాలని, సహాయక చర్యలు చేపట్టాలని స్థానిక అధికారులకు సూచించారు.