టీడీపీ సర్కార్ హయాంలో మంజూరు చేసిన రుణమాఫీ ఉత్తర్వుల్ని రద్దు చేసింది. ఈ ఏడాది మార్చి 10న జారీ చేసిన జీవో 38ని రద్దు చేస్తూ.. బుధవారం వ్యవసాయ శాఖ ఉత్తర్వులు జారీ చేసింది. తాజా నిర్ణయంతో పెండింగ్‌లో ఉన్న.. 4,5 విడత రుణమాఫీ నిధులు రూ.7959.12 కోట్లు నిలిచిపోయాయట. దీంతో టీడీపీ సర్కార్ హయాంలో ఇచ్చిన హామీ పత్రాల సంగతేంటని రైతులు ప్రశ్నిస్తున్నారు.
గత ప్రభుత్వం 4,5 విడతల్లో మొత్తం 10శాతం వడ్డీని కలుపుతూ జీవో నంబర్‌ 38ని ఇచ్చింది. ఈ జీవోను జగన్ సర్కార్ రద్దు చేసింది. రాష్ట్రంలో వైఎస్‌ఆర్‌ రైతు భరోసా పథకం అమలుకు సిద్ధమయ్యింది.. అందుకే ఈ తాజా ఉత్తర్వులు జారీ చేశారని తెలుస్తోంది. గత ప్రభుత్వ ఉత్తర్వులను రద్దు చేస్తూ జగన్ ప్రభుత్వం ఇప్పుడు జీవో 99ని విడుదల చేసింది.
రుణమాఫీ రద్దు చేయడంతో రైతులు గందరగోళంలో ఉన్నారు. గత ప్రభుత్వం రుణమాఫీ చేస్తుందనే ఆశతో గతంలో తీసుకున్న లోన్లు కట్టుకుండా ఆపేశారు. అయితే తొలి మూడు విడతలు రుణ మాఫీ చేసినా.. 4,5 విడతలు మాత్రం పెండింగ్‌లో ఉన్నాయి.. కొత్తగా ప్రభుత్వం అధికారంలోకి రావడంతో రుణమాఫీపై నీలి నీడలు కమ్ముకున్నాయి. ఇప్పుడు తాజగా ప్రభుత్వం తీసుకున్న నిర్ణయంతో రైతులు ఆందోళన వ్యక్తం చేస్తున్నారు.