హైదరాబాద్‌లో ఆటోలు బంద్ కానున్నాయి. తమ సమస్యల పరిష్కారం కోసం డిసెంబర్‌ 15న ఆటోల బంద్ నిర్వహిస్తున్నట్లు తెలంగాణ ఆటో డ్రైవర్స్‌ జేఏసీ కన్వీనర్‌ మహ్మద్‌ అమానుల్లాఖాన్‌ హెచ్చరించారు. ఆదివారం హైదర్‌గూడలోని ఎన్‌ఎస్‌ఎస్‌లో ఏర్పాటు చేసిన విలేకరుల సమావేశంలో ఆయన మాట్లాడుతూ.. పొరుగు జిల్లాల ఆటోలు గ్రేటర్‌ హైదరాబాద్‌లో అనుమతించకుండా చర్యలు తీసుకోవాలని పోలీసు, ఆర్టీఏ ఉన్నతాధికారులను కోరారు.
డీజిల్‌తో నడుస్తూ కాలుష్యాన్ని వెదజల్లుతున్న ఓలా, ఉబెర్‌ క్యాబ్‌లను నగరంలో తిరగకుండా నిషేధించాలని డిమాండ్ చేశారు. పెరిగిన నిత్యావసర ధరలకు అనుగుణంగా ఆటో మీటర్‌ చార్జీలను వెంటనే పెంచాలని, ప్రైవేట్‌ ఆటో ఫైనాన్షియర్ల దోపిడీని శాశ్వతంగా అరికట్టడానికి ప్రభుత్వం మార్గదర్శకాలను రూపొందించాలని మహ్మద్‌ అమానుల్లాఖాన్‌ డిమాండ్ చేశారు. ఆటో డ్రైవర్ల కోసం సంక్షేమ బోర్డును ఏర్పాటు చేయాలని కోరారు.