నందమూరి బాలకృష్ణ.. వందకు పైగా సినిమాల్లో నటించిన ఆయనకు అభిమానులంటే మక్కువ ఎక్కువ. వారికోసం ఏదైనా చేయడానికి రెడీగా ఉంటాడీ హీరో. కష్టాల్లో ఉన్నప్పుడు వారి వెన్నంటే ఉండటమే కాకుండా ఆపదలో ఉన్నవారికి ఆపన్నహస్తం అందిస్తాడు. తాజాగా అతడు ఒక అభిమానితో మాట్లాడిన ఫోన్‌కాల్‌ ఇప్పుడు సోషల్‌ మీడియాలో వైరల్‌గా మారింది.
చెట్టుపై నుంచి కింద పడి మంచాన పడ్డ అభిమానిని బాలకృష్ణ ఫోన్‌లో పరామర్శించాడు. త్వరలోనే ఆరోగ్యం కుదుటపడుతుందని అతడికి ధైర్యాన్ని నూరిపోశాడు. గతంలో తనకు కూడా నడుము విరిగిందని చెప్పుకొచ్చాడు. 1993లో ఆదిత్య 369 సినిమా చేస్తున్నప్పుడు కిందపడి నడుం విరిగిందని, కొన్నిరోజులు కష్టంగా ఉంటుంది కానీ త్వరగానే బాగవుతుందని తెలిపాడు.