మైక్రోసాఫ్ట్ సహ వ్యవస్థాపకుడు బిల్ గేట్స్.. భారత్‌పై ప్రశంస‌ల వ‌ర్షం కురిపించారు. ఇండియాలో ఆవిష్కరణలు అద్భుతంగా ఉన్నాయ‌ని కొనియాడారు. ప్రస్తుతం చైనా కాకుండా మరే దేశం నుంచైనా ప్రపంచం నేర్చుకోవాలనుకుంటే కచ్చితంగా భారత్ వైపు చూడాల్సిందేనని పేర్కొన్నారు. ఆర్థికప‌ర‌మైన ఆవిష్కరణలు, స‌మ్మిళిత వృద్ధి విష‌యంలో భారత్ విధానాలు చాలా బాగున్నాయ‌ని ఆయన అన్నారు.
సింగపూర్‌లో మంగళవారం (డిసెంబర్ 8) జరిగిన ఫిన్‌టెక్‌ సదస్సులో బిల్ గేట్స్ వర్చువల్‌గా మాట్లాడారు. ఈ సందర్భంగా భారత్ అవలంభిస్తున్న విధానాలను కొనియాడారు. డిజిటల్ ఆర్థిక కార్యకలాపాల నిర్వహణలో భారత్ అద్భుతమైన పద్ధతులను అవలంబిస్తోందని పేర్కొన్నారు. ఇవే విధానాల్ని ఇతర దేశాల్లోనూ అమలు చేసేందుకు తమ సంస్థ (బిల్ మిలిందా గేట్స్ ఫౌండేషన్) కృషి చేస్తోందని తెలిపారు.
భారత్‌లో నోట్ల రద్దు త‌ర్వాత డిజిటల్ పేమెంట్లు పెరిగిన విధానాన్ని బిల్ గేట్స్ ప్రత్యేకంగా ప్రస్తావించారు. ఈ విధానాల వ‌ల్ల పేద‌ల‌కు ప్రభుత్వ సాయం సులువుగా అందడంతో పాటు పంపిణీ ఖ‌ర్చు కూడా భారీగా త‌గ్గింద‌ని ఆయన వివరించారు. ఇలాంటి ఓపెన్ సోర్స్ టెక్నాల‌జీల‌ను వివిధ దేశాల్లో అభివృద్ధి చేసే దిశగా తమ ఫౌండేషన్ ప‌ని చేస్తోందని గేట్స్ తెలిపారు.
ఒక బ్యాంక్‌ లేదా స్మార్ట్‌ ఫోన్‌ నుంచి డిజిటల్ చెల్లింపులు చేసేందుకు వీలుగా భారత్ అత్యుత్తమైన వేదికల్ని అభివృద్ధి చేసిందని బిల్ గేట్స్ పేర్కొన్నారు. తద్వారా ఎలాంటి అవరోధాలు లేకుండా సులువుగా లావాదేవీలు పూర్తవుతున్నాయని.. పేద, మధ్య తరగతి ప్రజలకు ఆర్థిక ప్రయోజనాలు చేరువవుతున్నాయని వివరించారు. ముఖ్యంగా కరోనా సంక్షోభ సమయంలో ఇవి ఎంతగానో తోడ్పడ్డాయని అభిప్రాయపడ్డారు.
ఆర్థిక లావాదేవీల కోసం భారత్‌లో అనేక రకాల యాప్‌లు అందుబాటులోకి వచ్చాయి. ప్రభుత్వం కూడా అనేక యాప్‌లను అందుబాటులోకి తీసుకొచ్చింది. ముఖ్యంగా యూపీఐ పేరుతో ప్రభుత్వం తీసుకువచ్చిన ఏకీకృత చెల్లింపుల వ్యవస్థ ప్రజలకు ఎంతగానో ఉపయోగపడుతుంది. దీనికి స్మార్ట్‌ ఫోన్ల ఆధునిక టెక్నాలజీ కూడా తోడవ్వడంతో డిజిటల్ లావాదేవీలు పెద్ద ఎత్తున పెరిగాయి. బిల్ గేట్స్ తన ప్రసంగంలో ఈ అంశాలను ప్రధానంగా ప్రస్తావించారు.
లేటెస్ట్ కామెంట్