ఒక టైమ్‌లో ప్రతి సినిమాలోను తానే కనిపించిన బ్రహ్మానందం, ఎన్నో సినిమాల విజయాలకి పిల్లర్‌గా నిలిచిన బ్రహ్మానందం ఇటీవలి కాలంలో అసలు కనిపించడమే లేదు. ఒకవేళ కనిపించినా కానీ రెప్పపాటులో కనుమరుగయ్యే పాత్రల్లో మాత్రమే దర్శనమిస్తున్నారు. కామెడీ క్యారెక్టర్లు చేయడానికి చాలా మంది అందుబాటులోకి వచ్చేసిన తరుణంలో కామెడీ కింగ్‌కి ఇక చోటు వుండడం లేదు.
అయితే కృష్ణవంశీ తెరకెక్కించే ‘రంగమార్తాండ’ చిత్రంలో బ్రహ్మానందం కామెడీ వేషం కాకుండా కన్నీళ్లు పెట్టించే ఒక ఉదాత్తమయిన పాత్రలో కనిపించబోతున్నారు. ఇందులో ఆయన గెటప్‌ కూడా రెగ్యులర్‌ వేషాలకి భిన్నంగా వుండనుందని కృష్ణవంశీ తెలియజేసారు. బ్రహ్మానందం కొత్త గెటప్‌ చూస్తే ఆయనలోని మరో కోణం చూడబోతున్నామనే భావన కలగక మానదు.
మరాఠీ చిత్రం నటసామ్రాట్‌కి రీమేక్‌గా రూపొందే ఈ చిత్రంలో ప్రకాష్‌రాజ్‌, రమ్యకృష్ణ లీడ్‌ క్యారెక్టర్స్‌ చేస్తున్నారు. ఈ చిత్రానికి ఇళయరాజా సంగీతం అందిస్తున్నారు. నటసమ్రాట్‌ టైటిల్‌ అందుబాటులో వున్నా కానీ అది అక్కినేని నాగేశ్వరరావుకి మాత్రమే సరిపోయే పేరని ఆ టైటిల్‌ కాకుండా రంగమార్తాండ టైటిల్‌ని కృష్ణవంశీ ప్రిఫర్‌ చేసారు.