ఉత్తరప్రదేశ్‌కు చెందిన చింతహరణ్ చౌహాన్ అనే వ్యక్తి మాత్రం పెళ్లి కూతురు దుస్తులు ధరిస్తున్నాడు. అదేదో ఒకటి రెండు రోజులు అనుకుంటే పర్వాలేదు. కానీ, అతడు గత 30 ఏళ్లుగా ఆ దుస్తులనే ధరిస్తున్నాడు.ఎందుకని ప్రశ్నిస్తే ఒక భయానక కారణాన్ని చెప్పాడు. హౌజ్‌ఖాస్‌లోని జలాల్‌పూర్‌ గ్రామానికి చెందిన చౌహాన్ తన కుటుంబికుల మరణాలతో భయాందోళనలకు గురయ్యాడు. అప్పటి నుంచి అతడు ఎర్ర చీర కట్టుకుని పెళ్లికూతురులా ముస్తాబు అవుతున్నాడు.
చౌహాన్‌కు 21 ఏళ్ల వయస్సు ఉన్నప్పుడు మొదటి భార్య చనిపోయింది. ఆ తర్వాత అతడు పశ్చిమ బెంగాల్‌లోని దినాజ్పూర్‌లో ఇటుకల బట్టీలో పనిచేయడానికి వెళ్లాడు. ఈ సందర్భంగా అతడికి ఓ షాపు యజమానితో పరిచయం ఏర్పడింది. నాలుగేళ్ల తర్వాత చౌహాన్ ఆ వ్యాపారి కుమార్తెను పెళ్లి చేసుకున్నాడు. అయితే, ఆ పెళ్లికి చౌహాన్ కుటుంబ సభ్యులు ఒప్పుకోలేదు. దీంతో అతడు ఆమెను విడిచిపెట్టి యూపీలోని సొంత ఇంటికి వెళ్లిపోయాడు. ఈ మోసాన్ని తట్టుకోలేక ఆమె ఆత్మహత్య చేసుకుంది. ఈ విషయం ఏడాది తర్వాత చౌహాన్‌కు తెలిసింది. కుటుంబ సభ్యుల ఒత్తిడితో చౌహాన్ మూడో పెళ్లి చేసుకున్నాడు.
అప్పటి నుంచి చౌహాన్‌కు ‘హర్రర్’ సినిమా కనిపించడం మొదలైంది. మూడో పెళ్లి జరిగిన కొద్ది నెలల తర్వాత చౌహాన్ తీవ్ర అనారోగ్యానికి గురయ్యాడు. ఆ తర్వాత అతడి కుటుంబ సభ్యులు ఒక్కొక్కరిగా చనిపోవడం మొదలైంది. ముందు అతడి తండ్రి జియావన్, అన్నయ్య చొటావు, భార్య ఇంద్రావతి, ఇద్దరు కొడుకులు, తమ్ముడు బదావు చనిపోయారు. అయితే, ఆ మరణాలు అంతటితో ఆగలేదు. ఆ తర్వాత అతడి సోదరుల ముగ్గురు కుమార్తెలు, నలుగురు కొడుకులు సైతం చనిపోయారు.
ఈ సందర్భంగా చౌహాన్ మాట్లాడుతూ ‘‘రోజూ నా బెంగాలీ భార్య కలలోకి వచ్చింది. ఆమె మరణానికి నేనే కారణమని, నేను మోసం చేయడం వల్లే తాను చనిపోయానని తెలుపుతూ గట్టిగా ఏడ్చింది. ఓ రోజు ఆమెను కలలోనే క్షమించాలని వేడుకున్నాను. నా కుటుంబాన్ని వదిలిపెట్టాలని కోరాను. దీంతో ఆమె పెళ్లి కూతురు దుస్తులు వేసుకుని ఆమెను నాతోనే ఉంచుకోవాలని కోరింది. అప్పటి నుంచి నేను పెళ్లి కూతురు దుస్తుల్లోనే ఉంటున్నా. ఆ రోజు నుంచి నా ఆరోగ్యం బాగుపడింది. ఇంట్లో మరణాలు కూడా ఆగాయి. మిగతా కుటుంబ సభ్యులు కూడా అనారోగ్యం నుంచి బయటపడ్డారు. నన్ను ఈ దుస్తుల్లో చూసి అంతా నవ్వుకుంటారు. కానీ, కుటుంబం కోసమే నేను ఇలా చేశాను. వారిని రక్షించేందుకే నేను ఈ దుస్తులు ధరిస్తున్నాను’’ అని ఆ వ్యక్తి తెలిపాడు.