కరోనా థర్డ్ వేవ్ (మూడో దశ) చిన్న పిల్లలకు ప్రమాదకరమని నిపుణులు తీవ్ర హెచ్చరికలు జారీ చేసిన తరుణంలో.. కర్ణాటక రాష్ట్ర రాజధాని బెంగళూరులో పరిస్థితులు ఆందోళనకరంగా మారాయి. గత కొద్ది రోజులుగా చిన్నపిల్లల్లో భారీగా కరోనా కేసులు నమోదవుతున్నాయి. గడిచిన 5 రోజుల్లో బెంగళూరులో 19 ఏళ్ల లోపు వయస్సు ఉన్న 242 మంది పిల్లలు కరోనా బారిన పడ్డారు. ఈ వివరాలను బెంగళూరు మహానగర పాలికే వెల్లడించింది.
కోవిడ్ బారిన పడ్డ చిన్నారుల్లో తొమ్మిదేళ్ల లోపు వయసున్న వారు 106 మంది ఉన్నారని బీబీఎంపీ తెలిపింది. అలాగే 9- 19 ఏళ్ల వయసున్న పిల్లలు 136 మంది ఉన్నట్లు వెల్లడించింది. కోవిడ్ థర్డ్ వేవ్.. చిన్న పిల్లలపై ఎక్కువ ప్రభావం చూపుతుందన్న అంచనాల నేపథ్యంలో ఈ పరిణామం ఇప్పుడు కలవరపెడుతోంది. అయితే, మరికొద్ది రోజుల్లోనే చిన్నపిల్లల్లో కరోనా కేసులు మూడింతలు పెరిగే ముప్పు ఉందని కర్ణాటక ఆరోగ్య శాఖ వెల్లడించింది. జరుగుతున్న పరిణామాలను బట్టి, థర్డ్ వేవ్ ఇప్పటికే మొదలైందని పలువరు నిపుణులు చెబుతున్నారు.
కరోనా కేసులు భారీగా పెరుగుతున్న నేపథ్యంలో పిల్లలను మరింత జాగ్రత్తగా చూసుకోవాలని కర్ణాటక ఆరోగ్య శాఖకు చెందిన ఓ అధికారి సూచించారు. రాబోయే కొద్ది రోజుల్లోనే చిన్న పిల్లల్లో ఈ కేసులు మూడింతలు పెరిగే అవకాశముందని ఆ అధికారి అంచనా వేశారు. పిల్లలను ఇంటి నుంచి బయట అడుగుపెట్టకుండా చూసుకుని వైరస్ బారి నుంచి కాపాడుకోవడమే మన చేతుల్లో ఉందని ఆయన తెలిపారు. పెద్దలతో పోల్చితే చిన్నారుల్లో రోగనిరోధక శక్తి తక్కువగా ఉంటుందని, కాబట్టి పిల్లలను ఇంటికే పరిమితం చేయాలని తెలిపారు.
మరోవైపు, కర్ణాటకలో కోవిడ్ కేసులు మళ్లీ పెరుగుతున్న నేపథ్యంలో ప్రభుత్వం ఇప్పటికే నైట్ కర్ఫ్యూ (రాత్రి 9 నుంచి ఉదయం 5 వరకు) విధించింది. మ‌హారాష్ట్ర, కేరళ‌లో రాష్ట్రాల సరిహద్దు జిల్లాల్లో వారాంత‌పు కర్ఫ్యూ విధించారు. 8 కర్ణాటక సరిహద్దు జిల్లాలు- మైసూర్, చారమాజ్ నగర్, మంగళూరు, కొడగు, బెళగావి, బీదర్, కలబుర్గి, విజయాపుర జిల్లాలో వీకెండ్ కర్ఫ్యూ కొనసాగుతుందని సీఎం బసవరాజ్ బొమ్మై గత వారం తెలిపారు.