ఆస్తి కోసం ప్రియుడితో కలిసి ఓ మహిళ తన మాజీ భర్తను దారుణంగా చంపేసిన ఘటన విజయవాడలో జరిగింది. బిహార్‌కు చెందిన దినేష్‌కుమార్‌ సింగ్ (45) 14 ఏళ్ల కిందట విజయవాడకు వలస వచ్చి స్థిరపడ్డాడు. ఎనికేపాడులోని ఒక చెప్పుల తయారీ సంస్థలో పనిచేసే అతడికి భార్య చింతాసింగ్‌, కుమారులు సత్యం శివం, లక్ష దీప్‌ ఉన్నారు. దంపతుల మధ్య మనస్పర్థలు రావడంతో రెండేళ్ల కిందట విడాకులు తీసుకున్నారు. పిల్లల మైనార్టీ తీరే వరకు తల్లి వద్దే ఉంచాలని కోర్టు సూచించింది.
దినేష్‌కుమార్‌‌కు ప్రసాదంపాడులో సొంతిల్లు ఉంది. ఆ ఇంటిలోనే పై అంతస్తులో చింతాసింగ్‌, పిల్లలు, కింద అంతస్తులో దినేష్‌కుమార్‌ ఉండాలని న్యాయస్థానం పేర్కొంది. దీనితో రెండేళ్లుగా అదే ఇంట్లో వేర్వేరుగా ఉంటున్నారు. చింతా సింగ్ రామవరప్పాడులోని ఓ బేకరిలో పనిచేస్తుండగా.. దినేష్ తన ఇంట్లోనే చెప్పులు తయారుచేసి విక్రయిస్తున్నాడు. పిల్లల పోషణ ఖర్చులు తల్లి భరిస్తుండగా.. స్కూల్ ఫీజులు తండ్రి చెల్లిస్తున్నాడు. 17వ తేదీ రాత్రి గదిలో నిద్రపోయిన దినేష్ మరుసటి రోజు ఉదయానికి విగతజీవిగా మారాడు. అతడి వద్ద పనిచేసే యువకుడు వచ్చి చూడటంతో ఈ విషయం వెలుగులోకి వచ్చింది. అప్పటికే బేకరీకి వెళ్లిపోయిన చింతా సింగ్ భర్త మరణవార్త తెలిసి వెంటనే ఇంటికి చేరుకుని రోదించింది.