ప్రస్తుతం ప్రపంచంలో అత్యంత పాపులర్ స్మార్ట్‌ఫోన్‌ బ్రాండ్ యాపిల్‌కు చెందిన ఐఫోన్. ప్రపంచవ్యాప్తంగా ఏకంగా దాదాపు 100కోట్ల మంది ఐఫోన్‌లు వాడుతున్నారు. అంటే ఐఫోన్‌లకు ఎంత క్రేజ్ ఉందో ప్రత్యేకంగా చెప్పాల్సిన అవసరం లేదు. ఐఫోన్ కొత్త సిరీస్ విడుదలైనప్పుడల్లా.. వాటిని దక్కించుకునేందుకు లక్షల మంది ఎదురుచూస్తుంటారు.
యాపిల్ ఐఫోన్‌లంటే టెక్ ప్రియులకు అంత ఇష్టం. అలాంటి ఐఫోన్ ప్రపంచానికి పరిచయమై మొదలై 15 సంవత్సరాలు పూర్తయింది. 2007 జనవరి 9న తొలి తరం ఐఫోన్‌ను ప్రపంచానికి పరిచయం చేసింది యాపిల్. యాపిల్ సహ వ్యవస్థాపకుడు, సీఈవో స్టీవ్ జాబ్స్ అప్పుడు ఈ తొలి ఐఫోన్ గురించి తొలిసారిగా వెల్లడించారు.
2007లో ఐఫోన్ రాకతో టెక్నాలజీ ప్రపంచంలో తీవ్ర మార్పు వచ్చింది. అప్పట్లో ఫిజికల్ కీప్యాడ్‌తో ఉన్న బ్లాక్‌బెర్రీ ఫోన్లు ఆధిపత్యం చెలాయిస్తుండగా.. ఐఫోన్ తీవ్ర పోటీని ఇచ్చింది. ఆ తర్వాత యాపిల్ ఫోన్లు ఊహించని రీతిలో వేగంగా ప్రపంచమంతా విస్తరించాయి. తక్కువ కాలంలోనే అగ్రస్థానానికి చేరింది యాపిల్. కాగా ఇటీవలే బ్లాక్‌బెర్రీ ఫోన్ల కాలపరిమితి ముగిసిన సంగతి తెలిసిందే.
గత సంవత్సరం యాపిల్.. ఐఫోన్ 13 సిరీస్ స్మార్ట్‌ఫోన్లను విడుదల చేసింది. ఈ ఏడాది ఐఫోన్ 14 సిరీస్ రానుంది. కాగా, తొలి ఐఫోన్‌ను యాపిల్ ప్రపంచానికి పరిచయం చేసి 15 సంవత్సరాలు అయిన సందర్భంగా ఆ ఫోన్ స్పెసిఫికేషన్లు, ధర మిగిలిన విషయాలు చూడండి.
యాపిల్ తొలి ఐఫోన్ 320×480 రెజల్యూషన్ ఉన్న 3.5 ఇంచుల ఎల్‌సీడీ డిస్‌ప్లేతో వచ్చింది. ఓ ప్లైన్ హోమ్ బటన్, ఎక్కువ అంచులతో డిజైన్‌ ఉంది. సామ్‌సంగ్‌కు చెందిన 32బిట్ ARM ప్రాసెసర్‌తో తొలి ఐఫోన్ వచ్చింది. అలాగే 2 మెగాపిక్సెల్ కెమెరా వెనుక భాగంలో ఉండేది. అలాగే 128ఎంబీ ర్యామ్, 4జీబీ స్టోరేజీతో లాంచ్ అయింది.
అలాగే తొలి ఐఫోన్.. ఓఎస్ ఎక్స్‌తో మార్కెట్‌లోకి వచ్చింది. కాంటాక్ట్స్, కెమెరా, వాయిస్ మెమోస్, గూగుల్ మ్యాప్స్, వెదర్, సెట్టింగ్స్ అండ్ మోర్ లాంటి మొత్తం 15యాప్స్ ఈ ఫోన్‌లో ఉండేవి. అలాగే తొలి ఐఫోన్‌లో వెనుక కెమెరా ఉన్నా కేవలం ఫొటోలకు మాత్రమే సపోర్టు చేసేది. అలాగే 2జీ జీఎస్‌ఎం ఇంటర్నెట్, బ్లూటూత్, వైఫై లాంటి కనెక్టివిటీ ఆప్షన్లు ఉండేవి.
ఐఫోన్ తొలితరం ఫోన్ 499 డాలర్ల ధరతో వచ్చింది. 2007 జూన్ 29న అమెరికా మార్కెట్‌లో ఐఫోన్ మొదటి ఫోన్ విడుదలైంది. ఆ తర్వాత వచ్చిన ఐఫోన్ సిరీస్‌లన్నీ సూపర్ హిట్ అవుతున్నాయి. ప్రపంచంలోనే అతిపెద్ద బ్రాండ్‌గా అవతరించింది. ఈ సంవత్సరం ఐఫోన్ 14 సిరీస్ విడుదల కానుంది. ఇటీవలే యాపిల్ సంస్థ విలువ 3 ట్రిలియన్ డాలర్లకు చేరింది. దీంట్లో ఐఫోన్‌లదే ప్రధాన పాత్ర.