తెలంగాణ రాష్ట్ర ప్రభుత్వ ఉద్యోగులకు ముఖ్యమంత్రి కేసీఆర్ గుడ్‌న్యూస్ చెప్పారు. ఉద్యోగులందరికీ త్వరలోనే కరవు భత్యం విడుదల చేస్తామని స్పష్టం చేశారు. గురువారం మంత్రి శ్రీనివాస్‌గౌడ్‌ నేతృత్వంలో తెలంగాణ గెజిటెడ్‌ అధికారుల సంఘం అధ్యక్షురాలు మమత, ప్రధాన కార్యదర్శి సత్యనారాయణ తదితరులు సీఎంను ప్రగతిభవన్‌లో కలిశారు. ఈ సందర్భంగా ఉద్యోగులు, అధికారులకు సంబంధించిన పలు అంశాలపై కేసీఆర్ వారితో చర్చించారు.
ఈ సందర్భంగా కేసీఆర్ మాట్లాడుతూ.. కొత్త జోనల్‌ విధానం అమలు ప్రక్రియను సత్వరమే పూర్తి చేస్తామని, ఉద్యోగులను సర్దుబాటు చేసిన తర్వాత శాఖల్లో ఏర్పడే ఖాళీల భర్తీకి నోటిఫికేషన్లు జారీ చేస్తామని చెప్పారు. రాష్ట్రపతి ఉత్తర్వుల జారీలో జాప్యం జరిగినందున జోనల్‌ విధానం అనుకున్న సమయానికి అమల్లోకి రాలేదని, ఉద్యోగాల భర్తీలో జాప్యానికి ఇదే కారణమని స్పష్టం చేశారు. ఇప్పటికే ఉద్యోగుల వర్గీకరణ పూర్తయిందని, త్వరలోనే జిల్లాలు, శాఖల వారీగా ఉద్యోగుల సంఖ్య ఖరారవుతుందని తెలిపారు.
అనంతరం జోనల్‌లోని జిల్లాలకు ఐచ్ఛికాలు, సీనియారిటీ ఆధారంగా బదలాయింపులు ఉంటాయని సీఎం తెలిపారు. దానిద్వారా ఏర్పడే ఖాళీల భర్తీకి వెంటనే నోటిఫికేషన్లు ఇస్తామన్నారు. జోనల్‌ ప్రక్రియ ద్వారా 95 శాతం ఉద్యోగాలు స్థానికులకే దక్కుతాయని తెలిపారు. జోనల్‌ విధానం అమలు, ఉద్యోగుల బదలాయింపులు, కొత్త నియామకాలకు అందరూ సహకరించాలని ముఖ్యమంత్రి కోరారు. దేశంలో ఎక్కడా లేనివిధంగా తెలంగాణలో స్థానికులకు ప్రాధాన్యం కల్పిస్తూ జోనల్‌ విధానం తెచ్చారని, దానిద్వారా ఉద్యోగులతో పాటు నిరుద్యోగులకు మేలు జరుగుతుందని మమత, సత్యనారాయణ అన్నారు. జోనల్‌ అమలు ప్రక్రియకు తాము పూర్తి మద్దతు ఇస్తామని తెలిపారు.