బంగాళాఖాతంలో ఏర్పడిన ‘గులాబ్‌’ తుఫాను హైదరాబాద్ సహా తెలంగాణలోని పలు జిల్లాలను వణికించేసింది. సోమవారం తెల్లవారుజామున మొదలైన వర్షం రాత్రి 8 గంటల వరకూ పలు ప్రాంతాల్లో నిరంతరాయంగా కురుస్తూనే ఉంది. కుండపోత వర్షాలతో పలు ప్రాంతాల్లో కాలనీలు, రోడ్లు నీటమునిగి ప్రజలు ఇబ్బందులు పడ్డారు. వాగులు, వంకలు పొంగిపొర్లాయి. చెరువులు నిండిపోయాయి. సోమవారం ఉదయం నుంచి రాత్రి వరకు ఎడతెరపి లేని వానతో హైదరాబాద్ నగరం వణికిపోయింది. సాయంత్రం 4 నుంచి 6 గంటల వరకు కుండపోతగా కురవడంతో వందలాది కాలనీలు నీటమునిగాయి.
అనేక ఇళ్లలోకి నీరు చేరడంతో లోతట్టు ప్రాంతాల ప్రజలు తీవ్ర అవస్థలు పడ్డారు. కొన్నిచోట్ల రోడ్లపై నీరు చేరడంతో వాహన రాకపోకలు నిలిచిపోయాయి. బహదూర్‌పుర చౌరస్తా నుంచి కిషన్‌బాగ్‌ వెళ్లే రహదారిలో నడుము లోతు నీరు నిలవడంతో స్థానికులు తాళ్ల సాయంతో రోడ్డు దాటారు. మాదాపూర్‌ ప్రాంతంలోనూ రహదారులపై మోకాల్లోతు నీరు చేరింది. గ్రేటర్‌ వ్యాప్తంగా సోమవారం రాత్రి వరకు 42 పునరావాస కేంద్రాలు ఏర్పాటు చేశారు. వచ్చే 24 గంటల్లోనూ నగరంలో భారీ నుంచి అతి భారీ వర్షాలు కురిసే అవకాశం ఉందని వాతావరణ శాఖ హై అలర్ట్‌ ప్రకటించింది.
ఈ నేపథ్యంలో మంగళవారం ప్రభుత్వ కార్యాలయాలు, విద్యా సంస్థలకు సెలవు ప్రకటించారు. ప్రజలు అత్యవసరమైతేనే ఇంటి నుంచి బయటికి రావాలని హెచ్చరికలు జారీ చేశారు.సోమవారం రాజన్న సిరిసిల్ల జిల్లా చందుర్తి మండలం మర్రిగడ్డలో రాష్ట్రంలోనే అత్యధికంగా 18.13 సెంటీమీటర్ల వర్షం కురిసింది. జయశంకర్‌ జిల్లా చిట్యాలలో 16.13, సిరిసిల్ల జిల్లా నాంపల్లెలో 15.98, ఖమ్మం జిల్లా బచ్చోడులో 15.15, కరీంనగర్‌ జిల్లా కొత్తపల్లి-ధర్మారంలో 14.8, జమ్మికుంటలో 14.8, వీణవంకలో 14.3, వైరాలో 14.2, హైదరాబాద్‌లోని రాజేంద్రనగర్‌లో 11.08 సెం.మీ.ల వర్షపాతం నమోదైంది.
తెలంగాణలోని పలు జిల్లా్ల్లో నేడూ భారీ వర్షాలు కురుస్తాయని వాతావరణ శాఖ హెచ్చరికలు జారీచేసింది. ఉత్తర తెలంగాణతో పాటు సంగారెడ్డి, వికారాబాద్‌, మెదక్‌, కామారెడ్డి, రాజన్న తదితర జిల్లాల్లో భారీ వర్షాలు, ఇతర ప్రాంతాల్లో ఓ మోస్తరుగా కురిసే అవకాశాలున్నాయని వాతావరణ శాఖ రాష్ట్ర సంచాలకురాలు డాక్టర్‌ నాగరత్న తెలిపారు. మంగళవారం కొన్ని ప్రాంతాల్లోనే భారీ వర్షాలు కురిసే సూచన ఉన్నందున ఆరెంజ్‌ హెచ్చరికను జారీచేసినట్లు ఆమె పేర్కొన్నారు.