చాలా మంది భారతీయుల కల ఫారిన్ వెళ్లడం. విదేశాలలో సెటిల్ కావాలని చాలా మంది అనుకుంటూ ఉంటారు. కానీ విదేశాల్లో స్థిరపడాలంటే అంత తేలికైన విషయమేమీ కాదు. ఎన్నో లక్షల ఖర్చు అవుతుంది. బ్యాంకు గ్యారెంటీలు చూపాలి, స్యూరిటీలు ఇవ్వాలి. రుణం తీసుకోవడం కూడా పెద్ద ప్రాసెస్ ఉంటుంది. చాలా మందికి అంత తేలికగా రుణాలు లభించవు. కానీ ఇలాంటి అవసరం లేకుండా.. తేలికగా విదేశాలకు వెళ్లే ఛాన్స్‌ను కల్పిస్తోంది గుజరాత్‌లోని ఓ గ్రామం. విదేశాలకు వెళ్లాలనుకునే వారి గ్రామ ప్రజల కలలను సాకారం చేస్తోంది.
గుజరాత్‌లోని వడోదరా జిల్లాలో డోలరియా అనే గ్రామం ఉంది. ఈ గ్రామంలోని ప్రజలు లోకల్ కమ్యూనిటీగా ఏర్పడి, విదేశాలకు వెళ్లి చదువుకోవాలనుకునేవారి, అక్కడ స్థిరపడాలనుకునే వారి కలలను సాకారం చేస్తుంది. వీరి కోసం ఒక ఫండ్‌ను నిర్వహిస్తోంది. ఈ ఫండ్ ద్వారానే విదేశాలకు వెళ్లే వారికి జీరో వడ్డీ రేటుకే మనీని అందిస్తోంది. తిరిగి ఈ లోన్‌ను చెల్లించే ముందు వారు ఇబ్బందులు పడకుండా ఉండేందుకు ఎలాంటి ఈఎంఐ భారాన్ని వారిపై మోపడం లేదు.
మరో ఆసక్తికరమైన విషయం ఏమిటంటే.. విదేశాల్లో స్థిరపడిన వారు, తిరిగి లోకల్ కమ్యూనిటీకి చెల్లించే ముందు, వారు పొందిన మొత్తానికి డబుల్ అందిస్తూ మిగతా వారి డ్రీమ్స్‌ను నెరవేరుస్తున్నారు. లక్షలలో మనీని తీసుకున్న ప్రజలు, లోకల్ కమ్యూనిటీకి రెండింతలు మనీని ఇచ్చిన ఉదాహరణలు ఎన్నో ఉన్నాయని టైమ్స్ ఆఫ్ ఇండియా ఇంగ్లీష్ రిపోర్టు చేసింది. ఇలాంటి ఉదాహరణలలో ఒకటే ఇది… గాంధీనగర్ జిల్లాకు చెందిన అంకిత్ పటేల్ అనే యువకుడు అమెరికా వెళ్లాలనుకున్నాడు.
అతను బ్యాంకు నుంచి రుణం పొందేందుకు తగినంత ఆర్థిక సామర్థ్యత లేదు. దీంతో అంకిత్ పటేల్ ఈ లోకల్ కమ్యూనిటీని ఆశ్రయించాడు. వారంలోనే ఈ లోకల్ కమ్యూనిటీ అంకిత్‌కి కావాల్సిన మనీని సమకూర్చింది. అంకిత్ విదేశాల్లో చదువుకోవాలనే తన కలను ఈ లోకల్ కమ్యూనిటీ ద్వారా సాకారం చేసుకున్నాడు. అమెరికాలో తను సెటిలైన తర్వాత, తాను అందుకున్న మొత్తానికి రెండింతలు ఎక్కువ ఈ ట్రస్టుకి చెల్లించాడు. ఇలాంటి ఉదాహరణలు ఎన్నో ఉన్నాయి.
అక్కడి స్థానికులు చెప్పిన ప్రకారం, ఈ ట్రస్టులు అనధికారికంగా నడుస్తుంటాయని, లోకల్ కమ్యూనిటీలే ప్రజల ఫారిన్ డ్రీమ్‌ను నెరవేర్చేందుకు వీటిని ఏర్పాటు చేసినట్టు పేర్కొన్నారు.ఇటీవల గాంధీనగర్‌కు చెందిన ఓ కుటుంబం అమెరికాలో మంచు తీవ్రతను తట్టుకోలేక మరణించిన సందర్భంగా ఈ లోకల్ కమ్యూనిటీ వెలుగులోకి వచ్చింది. విదేశాల్లో స్థిరపడాలనుకునే వారికి లోకల్ కమ్యూనిటీ కల్పించే సౌకర్యాలు, ఇతర విషయాలను టైమ్స్ ఆఫ్ ఇండియా ఇంగ్లీష్ వెలుగులోకి తెచ్చింది.