|
ఏపీ ముఖ్యమంత్రిగా వైఎస్ జగన్ మే 30న ప్రమాణ స్వీకారం చేశారు. ఆ రోజు ఆయన ఒక్కరే ప్రమాణం చేయగా మంత్రులు జూన్ 8న ప్రమాణ స్వీకారం చేయనున్నారనీ ప్రచారం జరుగుతోంది. సామాజిక, ప్రాంతీయ సమతూకం, సీనియారిటీ, విధేయత తదితర అంశాల కలబోతగా.. మంత్రివర్గ కూర్పుపై జగన్ కసరత్తు చేస్తున్నారు. 151 స్థానాల్లో వైఎస్ఆర్సీపీ విజయం సాధించడంతో ఆశావహుల సంఖ్య కూడా ఎక్కువగానే ఉంది. పార్టీ పెట్టిన నాటి నుంచి జగన్ వెంటే నడిచిన నేతలు మంత్రి పదవులను ఆశిస్తున్నారు. మంగళగిరి నుంచి రెండోసారి ఎమ్మెల్యేగా గెలిచిన ఆళ్ల రామకృష్ణా రెడ్డికి మంత్రి పదవి దక్కుతుందని భావిస్తున్నారు. నారా లోకేశ్‌‌పై ఆళ్లను గెలిపిస్తే ఆయనకు మంత్రి పదవి ఇస్తానని ఎన్నికల ప్రచారం సందర్భంగా జగన్ హామీ ఇచ్చారు. అలాగే భీమవరంలో గెలిస్తే గ్రంథి శ్రీనివాస్‌ను కూడా మంత్రిని చేస్తానన్నారు. అలాగే చిలకలూరపేటలో రజనీ నీ గెలిపిస్తే అక్కడ ఉన్న మర్రి రాజశేఖర్ నీ ఎమ్మెల్సీ నీ చేసి మంత్రిని చేస్తానన్నారు. దీంతో ఈ ముగ్గురికీ మంత్రి పదవులు దక్కడం ఖాయమని భావిస్తున్నారు. ఉత్తరాంధ్ర నుంచి బొత్స సత్యనారాయణ, ధర్మాన ప్రసాద రావులకు మంత్రి పదవులు దక్కే అవకాశం ఉంది. గుడివాడ అమర్‌నాథ్, కోలగట్ల వీరభద్ర స్వామి, అవంతి శ్రీనివాస్ కూడా మంత్రి పదవులను ఆశిస్తున్నారు. గోదావరి జిల్లాల నుంచి ఎమ్మెల్సీ కోటాలో పిల్లి సుభాష్ చంద్రబోస్, కన్నబాబు, ఆళ్లనాని, గ్రంథి శ్రీనివాస్‌ల పేర్లు వినిపిస్తున్నాయి. కృష్ణా జిల్లాలో కొడాలి నాని, సామినేని ఉదయభాను, పార్థసారథి, గుంటూరు జిల్లాలో ఆళ్ల రామకృష్ణారెడ్డి, అంబటి రాంబాబు మంత్రి పదవుల కోసం పోటీ పడుతున్నారు. ప్రకాశం జిల్లా నుంచి బాలినేని శ్రీనివాసరెడ్డి, నెల్లూరు నుంచి మేకపాటి గౌతం రెడ్డి, ఆనం రామనారాయణ రెడ్డి, కడపలో శ్రీకాంత్ రెడ్డి.. చిత్తూరు నుంచి పెద్దిరెడ్డి రామచంద్రారెడ్డి, కరుణాకర్‌ రెడ్డి, రోజా, కర్నూలు నుంచి బుగ్గన, హఫీజ్ ఖాన్.. అనంతపురం నుంచి అనంత వెంకట్రామిరెడ్డి, కాపు రామచంద్రారెడ్డి, శంకర్‌నారాయణ తదితరులు మంత్రి పదవులను ఆశిస్తున్నారు. జగన్ తో కలిపి మొత్తం 26 మంది మంత్రులుగా ఉండే అవకాసం ఉంది. మరి ఈ మంత్రి పదవులు ఎవరెవరిని వరిస్తాయి అనేది ఆసక్తి కరంగా మారింది.
|
|
