ఏపీ సీఎం జగన్ అధికారాన్ని చేపట్టిన ఆరు నెలలలోనే సంచలన నిర్ణయాలు తీసుకుంటున్న సంగతి తెలిసిందే. అయితే జగన్ నిర్ణయాలపై కొందరు ప్రశంసలు కురిపిస్తుంటే మరికొందరు మాత్రం వాటిని తీవ్రంగా తప్పుపడుతున్నారు. అయితే వైసీపీ అధికారంలోకి రావడానికి ప్రధాన కారణాలైన నవరత్నాల హామీలలో జగన్ ఎక్కడ లేని ఆంక్షలు విధిస్తుండడంతో ప్రజల నుంచి దీనిపై భిన్నాభిప్రాయలు వ్యక్తమవుతున్నాయి.
అయితే ముందు నుంచి జగన్ నిర్ణయాలపై పాజిటివ్‌గా స్పందిస్తున్న కత్తి మహేశ్ ఇటీవల సోషల్ మీడియాలో జగన్ నిర్ణయాన్ని తప్పుపట్టిన సంగతి తెలిసిందే. జగన్ తీసుకొచ్చిన అమ్మ ఒడి పథకానికి సంబంధించిన నిధుల వ్యవహారంపై కత్తి మహేశ్ జగన్‌పై విమర్శలు గుప్పించారు. గత టీడీపీ హయాంలో కూడా ఒక వర్గం ప్రజల అభ్యున్నతిని తీవ్రంగా అడ్డుకున్నారని, ఇప్పుడు జగన్ కూడా చంద్రబాబులానే వ్యవహరిస్తున్నారని అన్నారు. అయితే ఇప్పటి వరకు పవన్ కళ్యాణ్, చంద్రబాబుపై విమర్శలు చేస్తున్న కత్తి మహేశ్ ఇప్పుడు జగన్ వైఖరిని కూడా తప్పుపడుతుండం ఏపీ రాజకీయాలలో ఈ విషయం తీవ్ర ఆసక్తి రేపుతుంది.