హుజూరాబాద్ ఉప ఎన్నిక కోసం గులాబీ బాస్ వ్యూహాత్మకంగా అడుగులు వేస్తున్నారు. ఈ నెల 16 వ తేదీన హూజూరాబాద్ లో సీఎం కేసీఆర్ భారీ బహిరంగ సభ నిర్వహిస్తున్నారు. హుజూరాబాద్ ఉప ఎన్నికను టీఆర్‌ఎస్ అధిష్టానం సీరియస్‌గా తీసుకుంది. దీంతో ఉప ఎన్నికకు షెడ్యూల్ రాకముందే.. ప్రచార జోరు పెంచింది. ఇప్పటికే పలువురు మంత్రులు సైతం నియోజకవర్గంలో పర్యటించి ర్యాలీలు నిర్వహిస్తున్నారు.
ఈ క్రమంలోనే ఈనెల 16న నియోజకవర్గంలో సీఎం కేసీఆర్ అధ్యక్షతన భారీ బహిరంగ సభ ఏర్పాటు చేయనుంది. ఇప్పటికే పాలన పరమైన అంశాల్లో కేసీఆర్ వేగం పెంచారు. ఉప ఎన్నిక ప్రచారం అనంతరం వరుసగా జిల్లాల పర్యటన చేయనున్నారు. హుజురాబాద్ ఉప ఎన్నిక నేపథ్యంలో జిల్లాల పర్యటన తాత్కాలికంగా వాయిదా పడింది. ఈనెల 16 హుజూరాబాద్ బహిరంగ సభ అనంతరం జిల్లాల సందర్శనపై ప్రణాళికలు ఉండేలా కార్యాచరణ సిద్ధం చేస్తున్నారు.
మరోవైపు సీఎం సభ నేపథ్యంలో మంత్రి హరీశ్ రావు, సీఎస్ సోమేష్ కుమార్ హెలికాఫ్టర్‌లో కరీంనగర్‌కు చేరుకున్నారు. అధికారులు వారికి ఘన స్వాగతం పలికారు. అనంతరం కేసీఆర్ బహిరంగ సభ ఏర్పాట్లపై సమీక్ష నిర్వహించారు. కలెక్టరేట్ లో సమీక్ష సమావేశం నిర్వహించి అధికారులకు పలు ఆదేశాలు జారీ చేశారు. సీఎం సభ ఏర్పాట్లతో పాటు దళిత బంధు పై కూడా చర్చ జరిగే అవకాశం కనిపిస్తోంది.