కృతీసనన్‌ లీడ్‌ రోల్‌లో నటించిన బాలీవుడ్‌ చిత్రం ‘మిమీ’ (2021) తెలుగు, తమిళ భాషల్లో రీమేక్‌ కానుందా? అంటే అవుననే అంటున్నాయి ఫిల్మ్‌నగర్‌ వర్గాలు. ‘మిమీ’ సినిమా తెలుగు రీమేక్‌ హక్కుల కోసం ఓ నిర్మాణ సంస్థ చర్చలు జరుపుతోందనే ప్రచారం సాగుతోంది.
అంతేకాదు… కృతీసనన్‌ చేసిన పాత్రను సౌత్‌లో కీర్తి సురేశ్‌ చేయనున్నారని, ఇప్పటికే ఆమెతో సంప్రదింపులు మొదలయ్యాయని టాక్‌. ఓ విదేశీ జంటకు బిడ్డను ఇవ్వడం కోసం సరోగసీ ద్వారా గర్భం దాల్చిన ఓ పెళ్లి కాని యువతి కథే ‘మిమీ’ చిత్రం. మరి.. ‘మిమీ’ రీమేక్‌కు కీర్తీ సురేశ్‌ పచ్చజెండా ఊపుతారా? వేచి చూడాలి.