దీపావళి కానుకగా ప్రేక్షకుల ముందుకు వచ్చిన కోలీవుడ్ మూవీ ఖైదీ బాక్సాఫీస్‌ను షేక్‌ చేస్తోంది. కార్తి హీరోగా లోకేష్‌ కనగరాజ్‌ ఈ సినిమాను తెరకెక్కించాడు. కార్తి మాస్‌ లుక్‌లో కనిపించిన ఈ సినిమాకు ఆడియన్స్‌ను నుంచి రెస్పాన్స్‌ వస్తోంది. కోలీవుడ్ తో పాటు తెలుగు రాష్ట్రాల్లో కూడా ఈ సినిమా రికార్డ్‌లు సృష్టిస్తోంది. విజయ్‌ హీరోగా తెరకెక్కిన బిగిల్‌ పోటిగా రిలీజ్ అయినా ఖైదీ బాక్సాఫీస్ ముందు సత్తా చాటింది.
ఖైదీకి సూపర్‌ రెస్పాన్స్‌ రావటంతో ఈ సినిమాకు సీక్వెల్‌ను కూడా ప్లాన్ చేస్తున్నారు చిత్రయూనిట్. తొలి భాగాన్ని సీక్వెల్‌కు అవకాశం ఉండేలా ముగించిన దర్శకుడు త్వరలోనే రెండో భాగాన్ని పట్టాలెక్కించేందుకు ప్లాన్ చేస్తున్నాడు. కార్తి కూడా ప్రమోషన్‌ కార్యక్రమాల్లో ఖైదీ మళ్లీ వస్తాడు అంటూ సీక్వెల్‌ విషయంలో హింట్ ఇచ్చాడు.
పదేళ్ల తరువాత విడుదలైన ఓ ఖైదీ తన కూతురిని తొలిసారిగా చూసేందుకు చేసే ప్రయాణం నేపథ్యంలో ఈ సినిమాను తెరకెక్కించారు. భారీ యాక్షన్‌ సీన్స్‌తో పాటు కంటతడి పెట్టించే ఎమోషన్స్‌తో తెరకెక్కిన ఈ సినిమాకు ప్రేక్షకులు బ్రహ్మారథం పడుతున్నారు. రిలీజ్ మూడు వారాలు కావస్తున్నా ఇప్పటికీ హౌస్‌ఫుల్ కలెక్షన్లతో కార్తి కెరీర్‌ బెస్ట్ వసూళ్లను సాధించింది.
ఈ సినిమాతో యంగ్ హీరో కార్తి తొలిసారిగా 100 కోట్ల క్లబ్‌లో అడుగుపెట్టాడు. ఈ సందర్భంగా తమకు ఇంతటి ఘన విజయాన్ని అందించిన ప్రేక్షకులకు కృతజ్ఞతలు తెలుపుతూ చిత్రయూనిట్ పోస్టర్‌ను రిలీజ్ చేశారు. ఖైదీకి పోటిగా రిలీజ్ అయిన బిగిల్‌ కూడా బాక్సాఫీస్ ముందు సత్తా చాటుతోంది.
విజయ్‌ హీరోగా అట్లీ దర్శకత్వంలో తెరకెక్కిన ఈ సినిమా 250 కోట్లకు పైగా గ్రాస్‌ సాధించి విజయ్‌ కెరీర్‌లో మరో బిగ్గెస్ట్‌ హిట్‌గా నిలిచింది. మహిళా క్రీడా కారుల కథతో తెరకెక్కిన బిగిల్‌ ఇతర భాషల్లో పెద్దగా ప్రభావం చూపలేకపోయినా తమిళనాట మాత్రం భారీ వసూళ్లతో దూసుకుపోతోంది.