హైదరాబాద్‌లోని ఖైరతాబాద్‌లో లబ్ధిదారులకు డబుల్ బెడ్రూం ఇళ్లను మంత్రి కేటీఆర్ అందజేశారు. గురువారం డబుల్ బెడ్రూం ఇళ్ల ప్రారంభోత్సవంలో మంత్రులు కేటీఆర్, తలసాని శ్రీనివాస్ యాదవ్, మహమూద్ అలీ పాల్గొన్నారు. ఈ సందర్భంగా కేటీఆర్ మాట్లాడుతూ.. తెలంగాణ రాష్ట్రంలో దేశంలో ప్రగతి పథంలో ప్రయాణిస్తోందని అన్నారు. రాష్ట్రంలో పేద ప్రజలు ముఖంలో చిరునవ్వు చూడాలని ఈ డబుల్ బెడ్రూం ఇళ్లు కేసీఆర్ ఇస్తున్నారని చెప్పారు.
మెయిన్ సెంటర్ పాయింట్‌లో పేదలకు ఉచితంగా డబుల్ బెడ్రూం ఇళ్లు ఇస్తున్నామని కేటీఆర్ తెలిపారు.. మార్కెట్‌లో రూ.50 లక్షల విలువ చేసే ఇళ్లు ఫ్రీగా ఇస్తున్నామన్నారు. గత ప్రభుత్వంలో కట్టిన ఇళ్లు డబ్బా మాదిరిగా ఉండేవని, కానీ ఈసారి ఎంతో సౌకర్యవంతంగా, నాణ్యంగా ఉండేలా ఇళ్ళు నిర్మించి పేదలకు అందజేస్తున్నామన్నారు.
9,714 కోట్ల రూపాయలతో హైదరాబాద్ పేదలకు డబుల్ బెడ్రూం ఇళ్లు కడుతున్నామని మంత్రి తెలిపారు.. వారం రోజుల్లో కొల్లూర్ డబుల్ బెడ్ రూమ్ ఇళ్లను సీఎం కేసీఆర్ ప్రారంభిస్తారన్నారు. ఒకే చోట 15,640 డబుల్ బెడ్రూం ఇళ్లను నిర్మించామని తెలిపారు. 18 వేల కోట్ల రూపాయలతో రాష్ట్రవ్యాప్తంగా పేదలకు డబుల్ బెడ్ రూమ్ ఇళ్లు కడుతున్నామన్నారు. కార్యక్రమంలో పలువురు ఎమ్మెల్యేలు, మేయర్ గద్వాల విజయలక్ష్మి, కార్పొరేటర్లు పాల్గొన్నారు..