లివర్‌ మన శరీరంలో రెండో అతిపెద్ద అవయం. గుండె, కిడ్నీలు, ఊపిరిత్తిత్తుల మాదిరిగానే.. మన ఆరోగ్యాన్ని జాగ్రత్తగా చూసుకోవడంలో కీలక పాత్ర పోషిస్తుంది. కానీ మనం కాలేయం గురించి పెద్దగా పట్టించుకోం. ఇది మనకోసం ఎంత కష్ట పడుతుంది. రక్తంలోంచి విషతుల్యాలను వేరు చేస్తుంది. తిన్న ఆహారం జీర్ణం కావటానికి తోడ్పడుతుంది. తిన్న ఆహారంలోని చక్కెరను గ్లైకోజెన్‌గా మారుస్తుంది. దీన్ని కణాల్లో నిల్వ చేసి అవసరమైనప్పుడు వినియోగించుకోవటానికి వీలు కల్పిస్తుంది. ఐరన్‌, రాగి, విటమిన్ల వంటి వాటిని నిల్వ చేసుకుంటుంది.
ఇలా చెప్పుకొంటూ పోతే లివర్‌ చేసే పనులు చాలానే ఉన్నాయి. శరీరం ఆరోగ్యంగా ఉండేందుకు లివర్‌ 500 విధులు నిర్వహిస్తుందని నిపుణులు అంటున్నారు.మీరు ఏది తిన్నా, త్రాగినా, అది ఆహారమైనా.. మద్యమైనా.. ఔషధమైనా.. ఆఖరికి మురికి పదార్థమైనా.. వాటిని లివర్‌ ఫిల్టర్ చేస్తుంది. మూత్రం, మలం ద్వారా శరీరం నుంచి విషాన్ని ఎప్పుడు తొలగించాలి.. పోషకాలను ఎప్పుడు నిల్వ చేయాలి, వాటిని తిరిగి రక్తంలోకి ఎప్పుడు విడుదల చేయాలని లివర్‌కు బాగా తెలుసు.
ఇది మన శరీరంలోనే స్మార్ట్‌ వర్కర్‌.లివర్‌ దెబ్బతింటే, మీ శరీరం బలహీనంగా మారుతుంది.మీకు వాంతులు, ఆకలి లేకపోవటం, ఎప్పుడూ నీరసంగా అనిపించడం, విరేచనాలు, కామెర్లు వంటి సమస్యలు వస్తాయి. చాలా మంది ఆల్కహాల్ మాత్రమే.. కాలేయానికి అతిపెద్ద శత్రువుని అనుకుంటారు. లివర్‌ను పాడు చేసే.. ఇంకా ఎన్నో డ్రింక్స్ మనం రోజూ కామన్‌గా తాగుతూనే ఉన్నాం.. లివర్‌కు హానిచేసే డ్రింక్స్ ఏమిటో చూసేయండి..
కూల్ డ్రింక్స్ తాగినా లివర్‌కు హాని జరుగుతుంది. కూల్ డ్రింక్స్‌లో చక్కెర స్థాయిలు ఎక్కువగా ఉంటాయి. చక్కెర ఎక్కవగా తీసుకోవడం వల్ల లివర్‌కు కొవ్వు పట్టే అవకాశం ఉంది. లివర్‌కు కొవ్వు పడితే.. చేసే పనులకు అడుగడుగునా అడ్డు తగులుతూ తీవ్ర సమస్యలకు దారితీస్తుంది. కాలేయంలో కొవ్వు పేరుకుపోయి కాలేయం పనిచేయడం కష్టమవుతుంది. క్రమం తప్పకుండా డ్రింక్స్ తాగేవారికి లివర్‌ కొవ్వు పట్టే అవకాశం ఎక్కువగా ఉంటుంది. ముఖ్యంగా అధిక బరువు, ఊబకాయులు మరింత జాగ్రత్తగా ఉండాలి.
ఎనర్జీ డ్రింక్స్ తాగితే.. మనకు ఉన్నపలంగా శక్తి వస్తుంది. దీనిలో ఇన్‌స్టెంట్ ఎనర్జీ ఇచ్చే పదార్థాలు చాలానే ఉన్నాయి. కానీ ఎనర్జీ డ్రింక్స్ ఎక్కవగా తీసుకుంటే లివర్‌ సమస్యలు వచ్చే అవకాశం ఉంది. కెఫీన్ తక్కువ స్థాయిలో తీసుకుంటే కాలేయం దెబ్బ తినే అవకాశం ఉండదు కాని.. అయితే కెఫిన్ ఎక్కువగా తీసుకుంటే లివర్‌ను దెబ్బతీస్తుంది. ఎనర్జీ డ్రింక్స్‌లో చక్కెర స్థాయిలూ ఎక్కువగా ఉంటాయి. చక్కెర ఎక్కువగా తీసుకుంటే లివర్‌ దెబ్బతినే ప్రమాదం ఉంది.
జర్నల్ ఆఫ్ క్లినికల్ ఎండోక్రినాలజీ అండ్ మెటబాలిజం ప్రచురించిన డేటా ప్రకారం.. శాచ్యురేటెడ్‌ ఫ్యాట్ ను ఎక్కువ తీసుకుంటే.. మీ లివర్‌కు నష్టం జరిగే అవకాశం ఉంది. సంతృప్త కొవ్వును ఎక్కువగా తీసుకోవడం వల్ల మీ కాలేయంలో కొవ్వు పేరుకుపోతుంది. ఒక కప్పు వెన్న తీసిన పాలలో 4.5 గ్రాముల సంతృప్త కొవ్వు ఉంటుంది, ఇది పెద్దవారికి రోజువారీ అవసరాలలో 20%.
బీర్ మరియు వైన్ తాగినా.. లివర్‌ సమస్యలు వస్తాయి. ఇవి ట్రైగ్లిజరైడ్స్ స్థాయిని పెంచుతాయి. ట్రైగ్లిజరైడ్స్ రక్తంలో ఉండే ఒక రకమైన కొవ్వు పదార్థం. దీనిలో కేలరీలు ఎక్కువగా ఉంటాయి. . లివర్‌లో ట్రైగ్లిజరైడ్స్ పేరుకుపోవడం వల్ల కాలేయ వ్యాధి వచ్చే అవకాశం ఉంది.
లివర్‌కు ఆల్కహాల్‌ను విచ్ఛిన్నం చేసే సామర్థ్యం ఉన్నా.. మీరు దాని సామర్థ్యం కంటే ఎక్కువ ఆల్కహాల్ తాగితే, అది క్రమంగా దెబ్బతింటుంది. ఇది కాలేయంలో కొవ్వు పేరుకుపోవడానికి దారితీస్తుంది. ఎక్కువగా తాగితే కాలేయంలో కొవ్వు పేరుకుపోతుంది. ఈ సమస్య ఏమాత్రం పెరిగినా అది మరెన్నో పరిణామాలకు దారితీస్తుంది.
అంతిమంగా అది లివర్‌ సిరోసిస్‌కు కారణం అవుతుంది.ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.