తమిళ స్టార్ దర్శకుడు లోకేష్ కనకరాజ్ దర్శకుడిగానే కాకుండా నటుడిగానూ తన సత్తా చాటుతున్నారు. తాజాగా ఆయన హీరోగా నటించిన తొలి చిత్రం “డిసి” ప్రేక్షకుల ముందుకు వచ్చి మంచి స్పందనను సొంతం చేసుకుంది. దర్శకుడు అరుణ్ మాతేశ్వరన్ తెరకెక్కించిన ఈ సినిమా థియేటర్లలో మూవీ లవర్స్కు సరికొత్త అనుభూతిని అందించింది.
ప్రారంభంలో నెమ్మదిగా ప్రేక్షకుల్లోకి వెళ్లిన ఈ సినిమా క్రమంగా మంచి టాక్ను సొంతం చేసుకుని బాక్సాఫీస్ వద్ద దూసుకెళ్లింది. ముఖ్యంగా లోకేష్ కనకరాజ్ నటనకు ప్రేక్షకుల నుంచి మంచి ప్రశంసలు లభించాయి. దీంతో ఈ చిత్రం ఆయనకు సెన్సేషనల్ డెబ్యూగా నిలిచింది.
తాజాగా “డిసి” (DC) ఏకంగా రూ.100 కోట్ల గ్రాస్ వసూళ్లను సాధించినట్లు తెలుస్తోంది. దీంతో ఇండియన్ సినిమా దగ్గర ఓ అరుదైన రికార్డు లోకేష్ కనకరాజ్ ఖాతాలో చేరింది. దర్శకుడిగా గుర్తింపు పొందిన వ్యక్తి హీరోగా నటించిన తొలి సినిమానే రూ.100 కోట్ల గ్రాస్ మార్క్ను అందుకోవడం విశేషంగా మారింది.
ఈ సినిమా విజయానికి సంగీత దర్శకుడు అనిరుద్ అందించిన సంగీతం కూడా కీలకంగా నిలిచింది. సినిమాలో సంజన, వామికా గబ్బి కథానాయికలుగా నటించగా, సన్ పిక్చర్స్ ఈ చిత్రాన్ని నిర్మించింది. “డిసి” సాధించిన ఈ భారీ వసూళ్లతో లోకేష్ కనకరాజ్ నటుడిగా కూడా తన ప్రయాణాన్ని ఘనంగా ప్రారంభించినట్టైంది.
