మధ్యప్రదేశ్‌ రాష్ట్ర ముఖ్యమంత్రిని ఎన్నుకునేందుకు బీజేపీ శాసనసభాపక్షం సోమవారం సాయంత్రం భోపాల్‌లో సమావేశం కానుంది. ఈ సమావేశం సాయంత్రం 4 గంటలకు ప్రారంభమవుతుందని, సీఎం అభ్యర్థి పేరును 7 గంటలకు ప్రకటిస్తారని తెలిసింది. ఈ సమావేశానికి కేంద్ర బీజేపీ పరిశీలకులు హర్యానా సీఎం మనోహర్ లాల్ ఖట్టర్‌, ఓబీసీ మోర్చా అధినేత కే లక్ష్మణ్‌, పార్టీ కార్యదర్శి అశాలక్రా హాజరు కానున్నట్టు సమాచారం. వీరందరూ ఉదయం 11 గంటలకు భోపాల్ చేరుకుంటారని ఓ జాతీయ మీడియా తెలిపింది.
మధ్యప్రదేశ్‌ అసెంబ్లీ ఎన్నికల ప్రచార సమయంలో సీఎం అభ్యర్థిగా బీజేపీ ఎవరినీ ప్రకటించలేదు. డిసెంబర్ మూడున ఎన్నికల ఫలితాలు వెలువడగా.. సీఎం ఎంపిక విషయంలో బీజేపీ ఎలాంటి నిర్ణయం తీసుకోలేకపోయింది. సీఎం రేసులో ప్రస్తుత ముఖ్య మంత్రి శివరాజ్‌ సింగ్‌ చౌహాన్‌తో పాటు సీనియర్‌ నేతలు జ్యోతిరాదిత్య సింధియా, ప్రహ్లాద్‌ పటేల్‌, నరేంద్రసింగ్‌ తోమర్‌, కైలాశ్‌ విజయవర్గీయ, వీడీ శర్మ ఉన్నారట.
