రంగస్థలం సినిమాతో బ్లాక్‌ బస్టర్ హిట్ కొట్టిన డైరెక్టర్ సుకుమార్ ఆ తర్వాత ఇంకే సినిమా ఒప్పుకున్నట్టు చెప్పలేదు. అయితే మహేశ్ బాబుతో సినిమా ఉంటుందని ప్రచారం జరిగింది. కానీ అనూహ్యంగా సుకుమార్ తాజాగా బన్నీతో సినిమా కమిట్ అయ్యాడు. నిజానికి మహేశ్ బాబు హీరోగా మైత్రి మూవీస్ బ్యానర్లో సుక్కూ తర్వాతి సినిమా ఉంటుందని గత ఏడాది అక్టోబర్లో ప్రకటించారు. ప్రి ప్రొడక్షన్ వర్క్ జరుగుతోందని అప్పుడే నిర్మాతలు చెప్పారు. ఇది మహేశ్ బాబు 26వ సినిమా. కానీ ఏమైందో ఏమో కానీ సడెన్‌గా సుకుమార్-అల్లు అర్జున్ కాంబినేషన్లో సినిమా తెరమీదకు వచ్చింది. మహాశివరాత్రి సందర్భంగా మైత్రీ మూవీస్ మేకర్స్‌లో సుకుమార్ దర్శకత్వంలో బన్నీ తన 20 సినిమాను అఫీషియల్‌గా ప్రకటించాడు. మరి మహేశ్ బాబుతో సుకుమార్ సినిమా ఏమైందని అందరిలోనూ అనుమానం మొదలయ్యింది.
అందుకే ట్విట్టర్ వేదికగా ప్రిన్స్ సమాధానం ఇచ్చాడు. క్రియేటివ్ డిఫరెన్సెస్ కారణంగా సుకుమార్‌తో సినిమా చేయడం లేదని, కొత్త ప్రాజెక్ట్ అనౌన్స్ చేసిన సుక్కూకి ప్రిన్స్ ఆల్ ది బెస్ట్ చెప్పాడు. ఈ సందర్భంగా సుకుమార్‌పై సూపర్ స్టార్ ప్రశంసలు గుప్పించాడు. సుకుమార్ అంటే నాకెంతో గౌరవమన్న ప్రిన్స్. 1 నేనొక్కడినే సినిమా ఓ క్లాసిక్‌గా మిగిలిపోతుందన్నాడు. ఆ సినిమా కోసం పని చేసిన ప్రతి క్షణాన్ని ఎంజాయ్ చేశానని ట్వీట్ చేశాడు. అయితే ఇక్కడ మళ్ళీ కన్ఫ్యూజన్ ఏంటంటే మైత్రీ మూవీస్ బ్యానర్లో సుకుమార్ దర్శకత్వంలో మహేశ్ హీరోగా సినిమా రూపొందాల్సి ఉండగా ప్రిన్స్ స్థానంలో బన్నీ ఎంటరయ్యాడా ? లేదంటే ఈ స్టోరీ వేరేనా ? అనేది.
