నాని ప్రస్తుతం బ్యాక్ టు బ్యాక్ చిత్రాలతో బిజీగా ఉన్నాడు. వరుస ప్రాజెక్ట్‌లను పట్టాలెక్కించాడు. ఇందులో మొదటగా శ్యామ్ సింగ రాయ్ అనే చిత్రం రాబోతోంది. డిసెంబర్ 24న ఈ సినిమా ప్రేక్షకుల ముందుకు రానుంది. ఈ క్రమంలో సినిమా ప్రమోషన్ కార్యక్రమాలను పెంచేశారు. ఇప్పటికే వదిలిన పోస్టర్లు, రైజ్ ఆఫ్ శ్యామ్ అనే పాట అందరినీ ఆకట్టుకుంది. తాజాగా ఇచ్చిన అప్డేట్ అందరిలోనూ ఊపునిచ్చేస్తోంది. తాజాగా టీజర్ అప్డేట్‌ను ఇచ్చారు. నవంబర్ 18న టీజర్ రాబోతోందని ప్రకటించారు.
నవంబర్ 18న ఈ మూవీ టీజర్ రాబోతోందని నిర్మాతలు ప్రకటించారు. ఈ మేరకు చిత్రయూనిట్ ఓ పోస్టర్‌ను రిలీజ్ చేసింది. అందులో నాని తన చేతిలో మండుతున్న కర్రను పట్టుకుని ఉన్నారు. నిప్పు కణికలతో పోస్టర్ పవర్ ఫుల్‌గా మారింది. టీజర్ ఎంతో హై ఇంటెన్స్‌తో ఉండబోతోందని పోస్టర్‌ను బట్టి చూస్తే అర్థమవుతుంది. నాని యాక్షన్ సీక్వెన్స్‌తో ఈ చిత్రంలో రచ్చ రచ్చ చేయబోతోన్నట్టు కనిపిస్తోంది. పోస్టర్‌లోనే ఇలా ఉంటే సినిమాలో ఇంకా హై మోడ్‌లో నాని దుమ్ములేపుతాడేమో.
కృతి శెట్టి, మడోన్నా సెబాస్టియన్‌, సాయి పల్లవిలు హీరోయిన్లుగా నటిస్తున్న ఈ చిత్రానికి సత్యదేవ్ జంగా కథను అందించారు. మెలోడి స్పెషలిస్ట్ మిక్కీ జే మేయర్ అద్భుతమైన సంగీతాన్ని అందిస్తుండగా.. జాన్ వర్గీస్ కెమెరామెన్‌గా పని చేస్తున్నారు. నవీన్ నూలి ఎడిటర్‌గా బాధ్యతలు నిర్వహిస్తున్నారు. భారీ వీఎఫ్ఎక్స్‌తో రాబోతోన్న ఈ చిత్రం దక్షిణాది అన్ని భాషల్లో డిసెంబర్ 24న విడుదల కానుంది. టాక్సీవాలా తరువాత రాహుల్ సంకృత్యాన్ చేస్తోన్న ఈ చిత్రం మంచి సక్సెస్ అయ్యేలా కనిపిస్తోంది.