యూజర్లకు టెక్నాలజీని దగ్గర చేయడంలో టెక్ దిగ్గజం గూగుల్ ఎప్పుడూ ఒక అడుగు ముందే ఉంటుంది. ఎప్పటికప్పుడు తన అప్లికేషన్లను అప్‌డేట్ చేస్తూ యూజర్ల పనిని సులువు చేస్తుంటుంది. టెక్నాలజీ సాయంతో ఏ పనినైనా సులువుగా పూర్తి చేయవచ్చని ప్రూవ్ చేస్తూ ఉంటుంది. ఇందులో భాగంగానే ఆండ్రాయిడ్ ఆటో అప్లికేషన్‌కి అప్‌డేట్ రిలీజ్ చేస్తున్నట్టు గూగుల్ ఇటీవల ప్రకటించింది. ఈ వెర్షన్‌లో కొన్ని సరికొత్త ఫీచర్స్ యూజర్లకు అందుబాటులోకి రానున్నాయి. ఈ అప్‌డేట్ ద్వారా యూజర్లు తమ కారు ఇన్ఫోటైన్మెంట్ స్క్రీన్‌పై వీడియో గేమ్స్ కూడా ఆడుకోవచ్చు. అయితే కారు డ్రైవింగ్‌లో ఉన్నపుడు గేమ్స్ ఆడేందుకు అవకాశం లేదు.
కేవలం కారును పార్క్ చేసి ఉన్నప్పుడు మాత్రమే గేమ్స్ ఆడుకునేందుకు వీలుంటుంది.హెటీఎంఎల్ 5 ప్లాట్‌ఫామ్, గేమ్ స్నాక్స్ రూపొందించిన పలు గేమ్స్ మాత్రమే ఇన్ఫోటైన్మెంట్ స్క్రీన్ మీద ఆడేందుకు అవకాశం ఉంటుంది. గూగుల్‌కి చెందిన ఏరియా 120 ఆధారంగా రూపొందించిన గేమ్స్ మాత్రమే ఇన్ఫోటైన్మైంట్ స్క్రీన్‌లో ఆడే వీలుంది. ఆండ్రాయిడ్ ఆటో బీటా వెర్షన్ వాడుతున్న యూజర్లకు ఈ గేమ్స్ ఇప్పటికే అందుబాటులో ఉన్నాయి. అయితే, హెచ్టీఎంఎల్ 5 ఆధారితం కావడం వల్ల ఈ గేమ్స్ ఆడేందుకు యాక్టివ్ ఇంటర్నెట్ కనెక్షన్ తప్పనిసరి. ఇంటర్నెట్ కనెక్షన్ ఉంటే గేమ్స్‌ని కావాల్సినంతసేపు ఆడుకుంటూ కారులోనే ఎంజాయ్ చేయొచ్చు.
ఆండ్రాయిడ్ ఆటో కొత్త అప్‌డేట్‌తో మరో కొత్త ఫీచర్ యూజర్లకు అందుబాటులోకి వచ్చింది. ఇది యూజర్లకు మరింత ఉపయోగకరంగా ఉండనుంది. డ్యుయల్ సిమ్ ఆండ్రాయిడ్ స్మార్ట్ ఫోన్ వాడుతున్న వారికి మరింత ఉపయోగకరం. కొత్త అప్‌డేట్‌తో యూజర్లు తమ ఫోన్లోని రెండు సిమ్‌కార్డుల్లో దేని నుంచి కాల్స్ చేయాలో ముందే ఆప్షన్ పెట్టుకోవచ్చు. ఇదికాక ఆండ్రాయిడ్ వర్క్ ప్రొఫైల్‌ని కూడా సెట్ చేసుకోవచ్చు. దీంతో భవిష్యత్తులో అటెండ్ కాబోయే వర్క్ మీటింగ్స్ వివరాలతోపాటు టెక్స్ట్ మెసేజ్‌లని కూడా కార్ స్క్రీన్ మీద చూసుకోవచ్చు.డ్రైవింగ్ మోడ్ ఫీచర్‌కి కూడా అప్‌డేట్‌లో గూగుల్ కొత్త హంగులు చేర్చింది.
ఆండ్రాయిడ్ స్మార్ట్ ఫోన్స్‌లో ఆర్టిఫిషయల్ ఇంటిలెజెన్స్ ఆధారిత వర్చువల్ అసిస్టెంట్లోని డ్రైవింగ్ మోడ్‌ని కూడా గూగుల్ అప్‌డేట్ చేస్తోంది. బ్లూటూత్ సాయంతో కానీ‘హే గూగుల్ లెట్స్ డ్రైవ్’ అనే కమాండ్‌తో కానీ స్మార్ట్ ఫోన్‌ని కారు డ్యాష్ బోర్డుకు కనెక్ట్ చేసినప్పుడు ఈ కొత్త డ్రైవింగ్ మోడ్ను యాక్సిస్ చేయవచ్చు. అంతేకాక ఒకేఒక్క ట్యాప్ సాయంతో ఈ డ్రైవింగ్ మోడ్.. బేసిక్ గ్లాన్స్ఎబుల్, ట్యాపబుల్ కార్డులను స్క్రీన్‌పై చూపిస్తుందని గూగుల్ చెబుతోంది. ఇక, ‘హే గూగుల్ టర్న్ ఆన్ ఆటో రీడ్’ అనే కమాండ్‌ని ఇవ్వడం ద్వారా గూగుల్ అసిస్టెంట్ మొబైల్‌లోని టెక్స్ట్ మెసేజ్‌లను చదివి వినిపిస్తుంది. అంతేకాక వాయిస్ కమాండ్స్ ద్వారా టెక్స్ట్ మెసేజ్‌లను ఇతరులకు పంపిస్తుంది.
డ్యాష్‌బోర్డు డ్రైవింగ్ మోడ్ అప్‌డేట్‌ని గూగుల్ ఈ వారంలోనే విడుదల చేయనుంది. తొలి విడతగా ఇంగ్లిష్ భాషలో ఇండియా, అమెరికా, ఆస్ట్రేలియా, కెనడా, ఐర్లాండ్, సింగపూర్, యునైటెడ్ కింగ్‌డమ్‌లో రిలీజ్ చేయనుంది. స్పెయిన్, మెక్సికో, జర్మనీ యూజర్ల కోసం జర్మన్, స్పానిష్, ఫ్రెంచ్, ఇటాలియన్లో కూడా అందుబాటులోక తీసుకువస్తుంది.గూగుల్ తన అమెరికన్ యూజర్ల కోసం ఆండ్రాయిడ్ ఆటోలో పేమెంట్ ఆప్షన్ కూడా లాంచ్ చేస్తుంది. యూజర్లు తమి ఇన్ఫోటైన్మెంట్ స్క్రీన్ నుంచి గూగుల్ పే సాయంతో ఫ్యూయల్ స్టేషన్లలో పేమెంట్స్ జరుపుకోవచ్చు. తొలి విడతగా 32,500 గ్యాస్ స్టేషన్స్‌లో ఈ ఆప్షన్‌ని అందుబాటులోకి తీసుకురానుంది.