ఎప్పటికప్పుడు కొత్త ఫీచర్లు తీసుకొస్తోంది ప్రముఖ మెసేజింగ్ యాప్ వాట్సాప్. యూజర్లకు కొత్త సదుపాయాలను వరుసగా అందిస్తోంది. అలాగే ఇప్పటికే ఉన్న ఫీచర్లకు సైతం మెరుగులు దిద్దుతూ యూజర్లను ఆకర్షిస్తోంది. ఇదే క్రమంలో డిసప్పియరింగ్ మెసేజ్ ఫీచర్లో కీలకమైన మార్పులు తీసుకొచ్చింది. నిర్దిష్ట కాల వ్యవధిలో చాట్ లోని మెసేజ్ లు ఆటోమేటిక్ గా డిలీట్ అయ్యేందుకు ఈ ఫీచర్ ఉపయోగపడుతుంది. గత సంవత్సరం నవంబర్ లో డిసప్పియరింగ్ ఫీచర్ను వాట్సాప్ తీసుకొచ్చింది. అయితే ఇప్పుడు చాలా ముఖ్యమైన మార్పులను, సదుపాయాలను అందుబాటులోకి తెచ్చింది. అవేంటంటే..
ఇంతకాలం చాట్ను ప్రత్యేకంగా సెలెక్ట్ చేసుకొని.. సెట్టింగ్స్లో డిసప్పియరింగ్ మెసేజ్ ఆప్షన్ ఆన్ చేసుకోవాల్సి ఉండేది. అయితే ఈ కొత్త అప్డేట్ ప్రకారం కొత్త చాట్లకు డిఫాల్ట్ గా డిసప్పియరింగ్ ఆప్షన్ ఎనేబుల్ అయి ఉంటుంది. అంటే కొత్త అప్డేట్ వచ్చాక వాట్సాప్ చాట్లో సెట్ చేసిన సమయాన్ని బట్టి చాట్స్ ఆటోమేటిక్ గా డిలీట్ అయిపోతాయి. ఈ ఫీచర్ గురించిన విషయాన్ని వాట్సాప్, ఫేస్ బుక్ మాతృసంస్థ మెటా సీఈవో మార్క్ జుకర్ బర్గ్ ప్రకటించారు.
ప్రస్తుతం డిసప్పియరింగ్ మెసేజ్ ఫీచర్లో ఒకే కాలపరిమితి ఉంది. అది ఏడు రోజులు. అంటే ఈ ఫీచర్ ఆన్ చేసుకుంటే ఏడు రోజుల గడువు దాటితే చాట్స్ లోని మెసేజ్ లన్నీ అన్నీ ఆటోమేటిక్ గా డిలీట్ అవుతాయి. అయితే ఈ ఫీచర్కు కొత్త కాలపరిమితిని తీసుకురానుంది వాట్సాప్. 24 గంటలు, 90 రోజుల వరకు ఈ కాలపరిమితి ఉండనుంది. అంటే 24గంటలు, 7రోజులు, 90 రోజుల ఆప్షన్లు రానున్నాయి. ఇప్పటికే కొన్ని వాట్సాప్ బీటా వెర్షన్లలో ఇది నడుస్తోంది. త్వరలోనే అందరికీ అందుబాటులోకి తీసుకొచ్చేందుకు వాట్సాప్ సిద్ధమవుతోంది.
ఇక కొత్త చాట్ లకు డిసప్పియరింగ్ మెసేజ్ ఆప్షన్ డిఫాల్ట్ గా ఆన్ లో ఉండనునుండగా.. ఎంత కాలపరిమితి తర్వాత మెసేజ్ లు డిలీట్ కావాలో యూజర్లు సెట్ చేసుకోవచ్చు. ఒకవేళ మెసేజ్ లు ఎప్పటికీ అలానే ఉండాలంటే డిసప్పియరింగ్ మెసేజ్ ఆఫ్ చేసుకోవచ్చు.త్వరలో డిసప్పియరింగ్ ఫీచర్ కొత్త సదుపాయాలు వాట్సాప్ యూజర్లందరికీ అందుబాటులోకి వచ్చే అవకాశం ఉంది. ఆండ్రాయిడ్, ఐఓఎస్ తో పాటు మిగిలిన ప్లాట్ఫామ్లకు ఈ ఫీచర్లోని అప్డేట్లు రానున్నాయి.