బిహార్ ఎన్నికల ప్రచారంలో చివరి రోజున ‘ఇవే నా చివరి ఎన్నికలు’ అంటూ ముఖ్యమంత్రి నీతీశ్‌ కుమార్ ప్రకటించిన విషయం తెలిసిందే. అయితే, తాజాగా ఆ వ్యాఖ్యలపై నితీశ్ యూటర్న్ తీసుకున్నారు. అసలు ఆ మాట అనలేదని, నా ఉద్దేశాన్ని తప్పుగా అర్ధం చేసుకున్నారని మాటమార్చారు. ఇప్పట్లో రిటైర్ అయ్యే ఉద్దేశం తనకు లేదని తాజాగా నీతీశ్‌ స్పష్టం చేశారు. ‘నేను రిటైర్మెంట్ గురించి మాట్లాడలేదు. అన్నీ బాగా ముగుస్తాయంటూ ప్రతి ఎన్నికల చివరి ర్యాలీలో ఇదే మాట చెబుతాను. మరోసారి మీరు నా ప్రసంగాన్ని వింటే మీకు ఆ విషయం స్పష్టమవుతుంది’ అని వెల్లడించినట్లు ఏఎన్ఐ వార్తా సంస్థ వెల్లడించింది.
శాసనసభ ఎన్నికల ప్రచారంలో భాగంగా చివరి రోజు పూర్నియా సభలో నీతీశ్‌ మాట్లాడుతూ..‘ఎన్నికల ప్రచారానికి ఇది చివరి రోజు. ఎల్లుండి చివరి దశ ఓటింగ్ జరగనుంది. ఇవే నా చివరి ఎన్నికలు. అన్నీ బాగా ముగుస్తాయి’ అంటూ ఉద్వేగంగా ప్రసంగించారు. దీనిపై విపక్షాలు తీవ్ర విమర్శలు గుప్పించారు. అదో రాజకీయ జిమ్మిక్కంటూ మండిపడ్డాయి. ఆయన మాటలు వింటే అసలు నైతిక విలువలు, సిద్ధాంతాలు లేవని అర్ధమవుతందని ఆర్జేడీ నేత తేజస్వీ యాదవ్ విరుచుకుపడ్డారు.
ఎన్నికల్లో అధికార ఎన్డీఏ విజయం సాధించి.. మహాకూటమి ఆశలపై నీళ్లు చల్లింది. కూటమి ముఖ్యమంత్రి అభ్యర్థి తేజస్వీ యాదవ్‌ను అధికారానికి దూరం చేసింది. దీంతో వరుసగా నాలుగోసారి నీతీశ్‌ కుమార్ ముఖ్యమంత్రి పీఠాన్ని అధిష్టించనున్నారు. దీపావళి తర్వాత ఆయన ప్రమాణస్వీకార కార్యక్రమం జరగనుంది. ‘బిహార్‌లో ఎన్డీఏ ప్రభుత్వం కొలువుదీరుతుంది, నాలుగు పార్టీలతో కూడిన తమ కూటమికే ప్రజల పట్టం కట్టారు.. అయితే, సీఎం పదవి నాకే దక్కాలని పట్టుబట్టడం లేదు’ అని నితీశ్ అన్నారు.