సుమారు రెండేళ్లుగా కరోనా వైరస్ ప్రపంచాన్ని గడగడలాడిస్తోంది. దాని పీడ ఇప్పుడిప్పుడే తగ్గుతున్న తరుణంలో కొత్తగా పుట్టుకొస్తున్న వైరస్‌లు ప్రజలను భయభ్రాంతులకు గురిచేస్తున్నాయి. తాజాగా మరో ప్రాణాంతకమైన మార్బర్గ్ వైరస్ బయటపడింది. ఆఫ్రికాలోని పశ్చిమ ప్రాంతం గినియా దేశంలో ప్రాణాంతకమైన మార్బర్గ్ వైరస్ బారినపడి ఓ వ్యక్తి మరణించినట్లు ప్రపంచ ఆరోగ్య సంస్థ (డబ్ల్యూహెచ్ఓ) వెల్లడించింది.
ఆగస్టు 2న గినియా దేశంలోని గుక్కెడో ప్రిఫెక్చర్‌లో మరణించిన రోగి నుంచి సేకరించిన నమూనాలలో ఈ ప్రాణాంతక వైరస్ కనుగొన్నట్లు డబ్ల్యూహెచ్ఓ తెలిపింది. గబ్బిలాల ద్వారా సోకే ఈ వైరస్ అత్యంత ప్రమాదకరమైనదని, ఈ వ్యాధి సోకితే 88% వరకు మరణాల రేటు ఉంటుందని స్పష్టం చేసింది. ఎబోలా వైరస్ లక్షణాలు కలిగిన ఈ వైరస్ కోవిడ్-19 మాదిరిగానే జంతువుల నుంచి మనుషులకు వ్యాపిస్తుందని తెలిపింది.
మార్బర్గ్ వైరస్ చాలా ప్రమాదకరమైందని, ఇది చాలా దూరం వ్యాప్తి చెందే అవకాశం ఉన్నందున తొలి దశలోనే నిలువరించాలని ఆఫ్రికా డబ్ల్యూహెచ్ఓ రీజినల్ డైరెక్టర్ డాక్టర్ మత్షిడిసో మోయిటి పేర్కొన్నారు. గినియాలో గతేడాది ఎబోలా వైరస్ సోకి 12 మంది ప్రాణాలు కోల్పోయారు. ఆ వైరస్‌ను అరికట్టిన కొద్ది నెలల్లోనే మార్బర్గ్ వైరస్ బయటపడటం ఆందోళన కలిగిస్తోందని డబ్ల్యూహెచ్ఓ పేర్కొంది. పశ్చిమ ఆఫ్రికాలో వైరస్ కనుగొనడం ఇదే మొదటిసారని డబ్ల్యూహెచ్ఓ పేర్కొంది. అధిక జ్వరం, తీవ్రమైన తలనొప్పి, అసౌకర్యంగా అనిపించడం ఈ వైరస్ లక్షణాలని తెలిపింది.