పార్లమెంట్ సమావేశాలకు బీజేపీ ఎంపీలు డుమ్మా కొట్టడంపై గుర్రుగా ఉన్న ప్రధాని నరేంద్ర మోదీ.. వారిని హెచ్చరించినట్టు తెలుస్తోంది. ‘‘మిమ్మల్ని మీరు మార్చుకోండి లేదంటే మార్పులు ఉంటాయి’’ అని మోదీ వార్నింగ్ ఇచ్చినట్టు విశ్వసనీయ వర్గాలు తెలిపాయి. ఎంపీలు, మంత్రులు క్రమశిక్షణతో మెలిగి, సమయపాలన పాటించాలని, నోరుజారవద్దని పదే పదే సూచించినా బీజేపీ నేతలు మాత్రం ‘పిల్లల్లాగా’ ప్రవర్తించడం పట్ల ప్రధాని తీవ్ర అసహనం వ్యక్తం చేసినట్టు సమాచారం.
‘పార్లమెంట్, సమావేశాలకు గైర్హాజరుకావద్దు.. ఇదే విషయం గురించి పదే పదే చిన్నపిల్లల్లాగా చెప్పడం మంచిది కాదు.. మిమ్మల్ని మీరు మార్చుకోండి లేకపోతే మార్పులు ఉంటాయి’ అని మంగళవారం జరిగిన బీజేపీ పార్లమెంటరీ పార్టీలో ప్రధాని హెచ్చరించినట్టు విశ్వసనీయ వర్గాలు తెలిపాయి. సీనియర్ మంత్రులు, కేంద్ర హోం మంత్రి అమిత్ షా, వాణిజ్య వ్యవహారాల మంత్రి పియూష్ గోయల్, విదేశాంగ మంత్రి ఎస్ జయశంకర్, పార్లమెంటరీ వ్యవహారాల శాఖ మంత్రి ప్రహ్లాద్ జోషి తదితరులు ఈ సమయంలో ఉన్నారు.
వీరితో పాటు బీజేపీ జాతీయాధ్యక్షుడు జేపీ నడ్డా కూడా సమావేశానికి హాజరయ్యారు. పార్లమెంట్ సమావేశాల్లో నాగాలాండ్‌లో సైన్యం ఆపరేషన్ వికటించి 14 మంది సాధారణ పౌరులు మరణాల సహా అధికార బీజేపీకి పలు అంశాల్లో తీవ్ర వ్యతిరేకత వ్యక్తమవుతోంది. ఈ విషయంలో మోదీ సర్కారుపై ప్రతిపక్షాలు ఎదురుదాడి చేస్తున్నాయి.
అలాగే, రాజ్యసభలో 12 మంది ప్రతిపక్ష సభ్యుల సస్పెన్షన్ అంశం కూడా అధికార పక్షానికి ఇబ్బందికరంగా మారింది. గత సమావేశాల్లో రాజ్యసభ ఛైర్మన్‌పై అనుచిత వ్యాఖ్యలు చేశారని ప్రతిపక్ష సభ్యులను సస్పెన్షన్ చేశారు. సస్పెన్షన్ విషయంపై పార్లమెంటరీ వ్యవహారాల మంత్రి ప్రహ్లాద్ జోషీ మాట్లాడుతూ.. ఎంపీలను సస్పెండ్ చేయమని ప్రభుత్వం బలవంతం చేసిందని, అయితే వారు క్షమాపణలు చెబితే సస్పెన్షన్‌ను ఉపసంహరించుకోవాలని భావించేందుకు సిద్ధంగా ఉన్నామని చెప్పారు.
అయితే, ఈ విషయంలో ఎంపీలు వెనక్కి తగ్గేందుకు నిరాకరించారు. ‘‘ఇది తప్పు, అప్రజాస్వామికం.. సభ నియమాలు, విధానాలకు విరుద్ధం’ అని పేర్కొన్నారు. గత సమావేశాల్లో చర్యలకు ఎంపీలను శిక్షించలేరని పలు నిబంధనలను ఉదహరించారు. మరోవైపు, సాగు చట్టాల రద్దు చేసినా.. మద్దతు ధర విషయంలో రైతుల ఆందోళనలకు ప్రతిపక్షాలు గొంతు కలిపాయి.