అమెరికా పాప్ సింగ‌ర్ బియాన్సీ అంబానీ పెళ్లి వేడుక‌లో చిందులేసిందట. ముఖేశ్ అంబానీ కూతురు ఇశా అంబానీ ప్రీ వెడ్డింగ్ వేడుక‌లో ఈ గ్రామీ విజేత త‌న గ‌ళంతో ఆక‌ట్టుకున్న‌ది. ఈ వార‌మే బిలియ‌నీర్ ఆనంద్ పిర‌మ‌ల్‌ను ఇశా అంబానీ పెళ్లిచేసుకోబోతున్న‌దన్న సంగతి తెలిసిందే. ఈ సంద‌ర్భంగా గ‌త వారం రోజుల నుంచి ఉద‌య్‌పుర్‌లో సంద‌డి నెల‌కొన్న‌ది. ఆదివారం ప్రీ వెడ్డింగ్ వేడుక‌లో భాగంగా భారీ మ్యూజిక్ ఈవెంట్‌ను నిర్వ‌హించారు.
బాలీవుడ్ స్టార్స్‌తో పాటు బియాన్సీ కూడా ఆ ఈవెంట్‌లో త‌న పాట‌ల‌తో హోరెత్తించింది. అమెరికా మాజీ మంత్రి హిల్ల‌రీ క్లింట‌న్ కూడా ఈ కార్య‌క్ర‌మానికి హాజ‌ర‌య్యారు. క్రేజీ ఇన్ ల‌వ్‌, సింగిల్ లేడీస్‌, ర‌న్ ద వ‌ర‌ల్డ్ లాంటి ఆల్బ‌మ్స్ చేసిన బియాన్సీ అంబానీ ఈవెంట్ కోసం స్లిట్ రెడ్ డ్రెస్సులో జిగేల్‌మంది. ఆమెతో పాటు బాలీవుడ్ హీరోయిన్లు ప్రియాంకా చోప్రా, దీపికా ప‌దుకునేలు కూడా డ్యాన్స్ చేశారు.