ప్రీమియమ్ ఫ్లాగ్‌షిప్ రేంజ్‌లో రియల్‌మీ జీటీ 2 ప్రో త్వరలోనే విడుదల కానుంది. ముఖ్యంగా ఈ ఫోన్‌ ప్రాసెసర్‌పైనే అందరి దృష్టి ఉంది. క్వాల్కామ్ అతిత్వరలో విడుదల చేయనున్న స్నాప్‌డ్రాగన్ 8 జెన్ 1 ప్రాసెసర్‌తో రియల్‌మీ జీటీ 2 ప్రో రానుందనే సమాచారం బయటికి వచ్చింది. ఇప్పటికే ఈ ఫోన్‌ టెస్టింగ్ జరుగుతోంది. అయితే ఇందులో ఆసక్తికర విషయాలు బయటపడ్డాయన్న సమాచారం వెల్లడైంది.
అంటూటూ బెంచ్ మార్క్ టెస్ట్ లో రియల్‌మీ జీటీ 2 ప్రో ఏకంగా 10లక్షల పాయింట్లకు పైగా స్కోర్ చేసిందని డిజిటల్ చాట్ స్టేషన్ వెబియో వెల్లడించింది. దీన్ని బట్టి ఈ ఫోన్‌ పర్ఫార్మెన్స్ ఏ స్థాయిలో ఉంటుందో అర్థం చేసుకోవచ్చు. మొత్తంగా 10,35,020 పాయింట్లు స్కోర్ చేసిందట ఈ మొబైల్‌.
రియల్‌మీ జీటీ2 ప్రో లాంచ్ గురించి రియల్‌మీ ఇంకా ఎలాంటి అధికారిక ప్రకటన చేయలేదు. అయితే స్నాప్‌డ్రాగన్ 8 జెన్ 1 ప్రాసెసర్‌తో మార్కెట్లోకి వచ్చే తొలి ఫోన్‌ ఇదే కావొచ్చనే అంచనాలు ఉన్నాయి. షియామీ సైతం పోటీలో ఉండగా.. అంతకంటే ముందే ఈ ఫోన్‌ వచ్చే ఛాన్స్ కనిపిస్తోంది. కాగా ఈ మొబైల్‌కు సంబంధించిన స్పెసిఫికేషన్లు కొంతకాలంగా చక్కర్లు కొడుతున్నాయి.
రియల్‌మీ జీటీ2 ప్రో 6.51 ఇంచుల ఫుల్ హెచ్‌డీ ప్లస్ అమోలెడ్ స్కీన్ హై రిఫ్రెష్ రేట్ తో వస్తుందని అంచనా. అలాగే 404 పిక్సెల్ డెన్సిటీ, 20:9 ఆస్పెక్ట్ రేషియో ఉంటుందని సమాచారం. ఈ ఫోన్‌లో 50 మెగాపిక్సెల్ ప్రధాన కెమెరా ఉండనుండగా.. ఆప్టికల్ ఇమేజ్ స్టెబిలైజేషన్ ఫీచర్ కూడా ఉంటుంది. అలాగే 32 మెగాపిక్సెల్ ఫ్రంట్ కెమెరా ఉంటుందని అంచనా.
వైఫై 6, బ్లూటూత్ 5.2 లేటెస్ట్ లేటెస్ట్ కనెక్టివిటీ ఆప్షన్లు ఇందులో ఉండనున్నాయి. ఇక రియల్‌మీ జీటీ 2 ప్రో ఏకంగా 125 వాట్ల ఫాస్ట్ చార్జింగ్ సపోర్టుతో వస్తుందని, 5000ఎంఏహెచ్ బ్యాటరీ అంచనా.జీటీ2 ప్రో రియల్‌మీ నుంచి వస్తున్న ఫ్లాగ్ షిఫ్ ఫోన్‌ కాగా దీని ప్రారంభ ధర రూ.46,800 దగ్గర్లో ఉండవచ్చు.
కాగా స్నాప్‌డ్రాగన్ 888 సక్సెసర్ గా స్నాప్‌డ్రాగన్ 8 జెన్ 1 ప్రాసెసర్‌ను క్వాల్కామ్ ఈ నెల 30న జరిగే సమిట్ సందర్భంగా ఆవిష్కరించే అవకాశం ఉంది. రియల్‌మీ జీటీ 2 ప్రోతో పాటు మోటోరోలా ఎడ్జ్, షియామీ 12, వన్ ప్లస్ 10 ప్రో సహా మరిన్ని ఫ్లాగ్‌షిప్ మోడళ్లు ఈ ప్రాసెసర్‌తోనే వచ్చే ఏడాది విడుదల కానున్నాయి.