హరియాణాలో సోమవారం ఉదయం ఘోర రోడ్డు ప్రమాదం సంభవించింది. అంబాలా-ఢిల్లీ జాతీయ రహదారిపై రెండు ప్రయివేట్ ట్రావెల్స్ బస్సులు ఒకదానికొకటి వెనుక నుంచి ఢీకొట్టాయి. ఈ ప్రమాదంలో ఐదుగురు మృతిచెందగా, మరో ఎనిమిది మంది గాయపడ్డారు. హీలింగ్ టచ్ హాస్పిటల్ సమీపంలో ఈ ప్రమాదం చోటుచేసుకున్నట్టు పోలీసులు తెలిపారు. ‘బస్సు ఢిల్లీవైపు వెళ్తుండగా వెనుక నుంచి మరో బస్సు ఢీకొట్టింది.. కేసు నమోదు చేశాం’ అని అసిస్టెంట్ సబ్-ఇన్‌స్పెక్టర్ నరేష్ పేర్కొన్నారు.
ఈ ప్రమాదంలో ఓ మహిళ సహా ఐదుగురు ప్రాణాలు కోల్పోగా.. మరో ఎనిమిది మంది గాయపడ్డారని చెప్పారు. డ్రైవర్‌పై కేసు నమోదు చేసి దర్యాప్తు చేస్తున్నట్లు పోలీసు అధికారి తెలిపారు. క్షతగాత్రులను చికిత్స కోసం సివిల్ ఆసుపత్రిలో చేర్పించామని ఎస్ఐ అన్నారు. ఆస్పత్రిలో చికిత్స పొందుతున్న క్షతగాత్రులను స్థానిక ఎమ్మెల్యే అసీమ్ గోయల్ పరామర్శించారు. ఈ సందర్భంగా బాధితులకు అన్ని విధాలుగా సహాయ సహకారాలు అందజేస్తామని, సురక్షితంగా ఇంటికి పంపుతామని ఆయన భరోసా ఇచ్చారు.
బస్సులోని మిగతా ప్రయాణికులకు ఆహారం అందజేసి మరో వాహనంలో వారికి ఇళ్లకు పంపే ఏర్పాట్లు చేస్తున్నట్టు ఆయన వివరించారు. ఘటనపై కేసు నమోదుచేసిన పోలీసులు.. మృతదేహాలను స్వాధీనం చేసుకుని పోస్ట్‌మార్టం కోసం తరలించారు. ముందున్న బస్సును అధిగమించే క్రమంలో వెనుక నుంచి వచ్చిన వాహనం బలంగా ఢీకొట్టిందని పోలీసులు తెలిపారు. డ్రైవర్ తప్పిదం వల్లే ఈ ప్రమాదం జరిగినట్టు ప్రాథమికంగా నిర్ధారించారు. గాయపడినవారిలో మరో ఇద్దరి పరిస్థితి విషమంగా ఉన్నట్టు వైద్యులు తెలిపారు.